موبايلي اليديد حده لذيييييذ!

بعد ما مليت من الأي فون!

ولاعت چبدي من الأي ميت!

لأنهم طلعوا ،،، "أي  كلام!"

فشفت انه ما فيها "أي شي!" اني اخذ هذا التلفون!

الي سميته

"أي سكريم iSCREAM"

حده لذيذ وخصوصا الدقم!

وسعره بس 100 فلس وفيه رصيد 100 فلس علشان تدزلك چم مسج بالمرة وانت قاعد تاكله!

،،، شين تشكر إتّشالك!

سيد الأدلة!

كم كيلو زاد وزنك بعد نهاية هالشهر؟

اعترف!

الميزان اشتكى ويقول:

حرام اللي قاعد تسويه فيني!

ابوس ايدك ارحمني!

ادعي ربي كل يوم انك تضعف ويصير وزنك مثالي،

علشان افتك من الدوس كل يوم!

انا زدت ٤ كيلو...

قول ولا تستحي! لا تقول لي وزنك، بس قول لي اذا زاد او نقص؟

وكل عام وانتم بخير

يبيله طق! 2

اليوم رحت حق "بنك يبيله!" علشان الرقم السري! بس ليلحين ما اشتغل السيستم مالهم!

يعني من يوم الاربعاء لي يوم الاثنين وماانحلت المشكلة!

يا ترى شنو بعد يبيله؟!

يا ترى وينچ؟!!

ليش اللحظات السعيدة تمر بسرعة، واذا ناديناها ما ترد علينا وتكمل في طريجها

ليش الاكلة الحلوة طعمها ما يضل في حلج البني ادم

ليش العيد مو مثل اول

لييييش محد يعطيييني عيدية !!!

تذكرون اخر مرة حصلتوا عيدية؟ ما اقصد الحريم؟

لأن العيدية بالنسبة لهم مستمرة وما تتوقف مع زيادة العمر!

مادري! يمكنهم دافعين اشتراكات حق التأمينات!

احنا يالشباب، الي صرفنا عيادينا على الخرابيط!

تذكرون قبل "نحن والاطفال"     لوووول

تقول الواحد چنه اول مرة يطلب من أمازون ، اششششخط بالڤيزا     لووووول

ايام وراحت! وما راح ترجع!

عيديتي! يا ترى وينچ؟!...

.......

مستوحى من موضوع 7anna7inno

برّييد!

إذا كنت برّييد! يعني تحب البرد! راح يعجبك هالبرد

هذا البرد صج يبرد چبدك!

يعني راهي مو مثل برد "كنت اكاكي" اللي فاضي من داخل وبس شويه من فوق!

في منه منجا وفراولة وفي توت وشمام وهم في ككاوحليب

اللي يبيه يلاقيه بمحل العصير بجمعية العديلية

اليوم فصلت وقلت باكل اثنين سوا يعني ثري**  P:

واخر مرة ادز بوست من الأيفون والعربي الدايخ ماله  لووووول

يبيله طق!

قبل مدة كنت في"دعم العبالة!" وكان بنك يبيله موجود، فالريال فتح لي حساب، بس اخذ صورة البطاقة المدنية عالسريع.

رحت استلم البطاقة طلع السبلنج ما الاسم غلط، لأن الاخ الموظف ما سألني وهو عباه على كيفه! فقلت لهم يسوون لي كرت ثاني!

رحت امس استلم الكرت، واستلمته بس ماكو رقم سري! لأنه الجهاز خربان! الموظفة قالتلي مر باچر!

رحت اليوم ولا ليلحين موشغال، قالت لي جرب فرع ثاني! رحت فرع ثاني! قال لي "السيستم كله موشغال! ماكوا الا يوم الاحد"!!

يا جماعة دلوني!  في بنك مضبوط؟!!

ماكو "لوووول" اليوم!   لوووووول

يفتح الله!

رحت اليوم اسكر حسابي من بيت التوريط! طبعاً زحمة كالعادة ومافي الا ٢ عالكاونتر ومليون عميل!

انا كنت ناوي اسكر الحساب، بعد لوعة الچبد الي سووها لي!!

وبعد ما وصل دوري، الموظف قال لي ان لازم يطلعوون براءة ذمة أول، بعدين تقدر تسكر الحساب! والسالفة يبيلها ٣ ايام عمل يعني راحت لي ورا العيد!!

استانست وايد لأني لقيت سالفة يديدة حق البلوق! ولا عادةً اكون معصب، والله البلوق هذا عجييييب، يعني فشششش خلأك!

زواج المبلاق! او زواج المدوان!

يا ترى اذا كان في مثل هالزواج، چان شصار؟؟

يعني واحد ووحدة يشتركون ببلوق واحد، علشان تساعده بالبلوق، وتكتب له مقالاته وتسنع له التمبلت والجافا سكربت، وهو يرد على التعليقات الحلوة! ويدور مواضيع يديدة! ويمكن الله يرزقهم ببلوق ثاني صغيّر يفرحون فيه! ولا شرايكم؟!

هالايام دايرة سالفة الي يقول شوفولي عروس، وشرط تكون تشتغل، ومدرّسة بعد! احد يقول لي ليش مدرّسة بالذات؟!

الله يرحم زمان اول، يوم ما كانوا يشرطون انها ما تشتغل!!

الزمن قاعد يتغير! يا ترى بعدين شنو بيشرطون؟

تخيل الخاطب يقول:

"تدفيعين لي اقصاد سيارتي، ومصاريف اليهال عليچ، والاجار بالنص، واذا سيارتي خربت تصلحينها! وماچلة البيت وزقايري ومعاش الخدامة! ولا انا شحقه ماخذ وحدة تشتغل؟!!"

المخطوبة:

"ماتبي اسد لك القرض مال المهر بعد؟!!"

زين! وبعدين؟!!

"هيّن، أراويك، يصير خير" كلها اسامي شركات اتصالات يديدة راح تفتح، السؤال بمنو راح تكتتب؟!

شي زين! يصير في وايد شركات اتصالات علشان كل ما تعصب من شركة تروح حق الثانية، ليما ترد تلف من الاول وهلمه جرّه!

بس رقمك شلون؟

 بامريكيا "والدول المتقدمة" رقمك تقدر تنقلة من شركة لي شركة عادي، منت مربوط بهيين ولا هيين!

اذا صار رقمك ملعوز بعد الزيادة، فابشرك انه بتطلع ارقام وايد يديدة، ذهبية وماسية، وزمردجية بعد! وباسعار معقولة، ففرصتك الحين اذا بتغير رقمك!

ماك وفايدة أبل!!

اذا كنت تستخدم الماك راح تفهم قصدي، انا احب الماك، ومع ذلك استخدم الماك والويندوز بنفس الوقت!  يقولون راعي البالين چذاب. يا ترى چم بال عندك؟

اذا كنت تستخدم البي سي ، ومتحسف تشتريلك ماك، وماتبي تدش بلوية الهاك، تقدر تشتري هذي القطعة وتحطها داخل كمبيوترك (الدسك توب) وبالهندي (دكس توب) لوووول

المهم القطعة تخليك تقدر تركب سيستم الماك الاصلي بدون هاك ولا عطني لووووول مليييييق!

القطعة من تايوان تكلف 125$ يعني اذا شفتها بالكويت، بتنباع حروة الستين دينار، وموتوا قهر يا ابل لووووول

عاد انا ريال ماكي بس ساعات ابل يحرونك! ومايبردون الچبد، يعني لازم التكنلوجيا ينزلونها بالقطارة!

سوو حسابكم، ما راح تطول السالفة قبل لا تبتدي تشوف سوالف مثل ديل او توشيبا وعليه ماك او اس الاصلي، وبعدها بمدة يالله يصير الماك او اس ينباع للكل!

والله اعلم

ريحة؟! لها صوت!!

الريحة قاعدة تسبب لي مشاكل بالبيت، حبيت اني اناقش الموضوع مع اسرتي،، فلميت القطاوه ويبت البغبغاء وقعدنا عند حوض السمج وصار بينا هالحديث

البغبغاء: انا مالي شغل، كله من القطاوه

القطاوة: معروف منو سبب الزفرة! طبعاً السمج

السمچة:بق بق بق

انا: عندچ دليل على هالكلام

السمچة: بق، بق بق بق بق

انا: مدام السالفة چذية لازم اكنسل اشتراك طواليتي نت، علشان افتك من الريحة الخايسة

***

على طاري ريحة خايسة

طق على اسم البوست "ريحة؟!"  وشم!! قصدي شووف!  اهل باريس ما خلو شي!!

حوضي وملاقت سمچ!

هذي صورة حق حوضي، فيه سمچ وياقوت ومرجان! أحمدك يا رب! لوووول

السؤال هو شنو شعور هذي المخلوقات وهيا محطوطة بحوض مثل هذا! وكأنهم قاعدين يمثلون بمسرحية !

عاد السمج كله ضغاط، طا ذيلچ ،چنة مساحة سيارة!!! لاااا من شاف زعنفتچ چنها مخمة حارس! ملاقت سمچ!

كاميرتي حمّضت!

تصور! انه صارلي ثلاث سنين من خذيت النايكون وصوري ليلحين عالهارد ديسك، المشكلة مليون هارد ديسك عندي، يعني "شيلمهن شيلمهن!"

صوري "حمّضوا" وهما على الهارد ديسك يعني صار ما يبيلهم تحميض!

أخيرا صار في معنى من تصويري العشوائي!

مع اني احب التصوير، الا اني تعبت من شيلة جنطة الكاميرا الي متروسة عدسات وفلاشات واكسيسوريز زايدة، بصراحة چتوفي راحوا!

المهم انا ناطر نايكون المحترمين يطلعون كاميرا سنعة ماتفشل مثل ال D3 التعبانة!! ثلاث سنين ناطر شنو؟ 12 ميجا بيكسل، والله فشلة!

شكرا عرب نوكيا

اخر قطوة انباعت، وابصراحة انا وايد راح اوله على هذي القطاوة

خنقتني العبرة

مو علشان راح أوله عليهم!

علشان خلصت من الموضوع, لوووووول

لاعت جبدي، صارلي شهر على هالسالفة

المهم اهني الي شروا والي ما شرى يجهز نفسة بعد ٣ اشهر انشالله في يديد

وهذي صورة تذكارية، ودرع حق عرب نوكيا وأقول لهم مشكورين على الدعم ويعطيكم الف عافية

عيال حصان البحر

ذاك اليوم قعت من النوم جان امر على الحوض, اطالع جان الاقي شي غريب, والا شنو!

الحوض متروس حصن يهال! وناااااااسه

   

اخيرا شفت عيال الحصان, لأني قاصد اخذهم يوز. وهذي اول مرة اشوف الانتاج مالهم

بس يا فرحة ماتمت راحو كلهم بالفلتر

مع اني يبت شبكه وخمطت اللي اقدر عليه, وحطيتهم بحضانه, بس حظي فتحات الحضانة وسيعة وما فادت

بس اكتشفت ميكي بهالصورة

 

تمثال الحرية الشخصية!

كنت ابي الشمس تصير على الشعلة! لكن للأسف شوف حظي شلون صار!!

غشمرة بايخة!

اذا حبيت تطفر صايم، تطفره مو تفطره ، بس قوله "بسكوت مالح، بسكوت مالح، بسكوت مالح"

وشوف شيقول لك!

شبيه بورات Borat

اذا شفت انك تشبه اي شخصية معروفة خصوصا شخصيات هوليوود، مالك الا انك تطق لك تذكرة وتروح هوليوود. عندهم شارع هوليوود بولڤارد، متروس ناس يقلدون شخصيات معروفة, وراح تملين من التبس!

هذا شبيه بورات صورته، والمشكلة بروحي ولا چان صورت وياه! بعد عندي من هالسوالف وايد! علق اذا تبي اكثر!

اعلانات غير نمونه!

وانا بهوليوود كنت بالباص المكشوف مال السياح چان اشوف هذا الريال مشغل موسيقي ويسوي حركات تضحك، هذا نوع من الاعلانات عندهم، اشوه ما عندنا چذيه! چان برمضان مانخلص من هالسوالف!

عمرو خالد بامريكا!

وانا بامريكا بلوس انجلوس شفت اعلان على احد الباصات وفي صورة واحد يشبه الداعية عمرو خالد، طبعا شتان بين الاثنان!

بلوسپوت، بعد ما حطيتها بالحوض

هذي البلوسپوت بعد ما تعودت على الحوض، وشكلها بتصير البوس علشان اهيا اكبر وحدة!

مس گوچاني!

هذي گوچاني في وضع اغراء!

عنتر يا حاميهييي!

هذا عنتر، سبب البلاوي كلها! بس حبيب، ان شاء الله راح اصور ڤيديو حقة يسوي حركه وايد تضحك.

دايما اقول له "يا عنتر، حميت البيت، ودافعت عن القطاوة، فمن اليوم انت محسوب من فرسان بني عبس لا من قطاوتها، اي والله ايوالله"

نجمة سبايدرمان!

نجمة البحر هذي اول ما شفتها شريتها لأنها تذكرني بسبايدرمان! ولا شرايكم؟

صور القطاوة الي بعتهم

احلى شي القطاوة واهما صغار، خصوصا اذا كانو چم واحد، لأنهم يلعبون ويناططون، وايد يونسون.

ولو يضلون صغار چان ما ابيعهم!

اخر قطوة للبيع!

هذي آخر قطوة عندي للبيع، بس ليلحين ما يالها النصيب! 

بلو سبوت

اليوم شريت سمچة حق الحوض اسمها بلو سپوت تانگ (Blue Spot Tang) الصورة خايسة بالايفون ماخذها!

المسلسل الرمضاني "بيت التوريط!"

الحلقة الأولى

البنك المتأسلم الي اسمه بيت التوريط او بيت التوهيق، وبالاخص قسم الفيزا "المحترمين" ما يعرفون يشتغلون و سستمهم مخرف، ولا يحترمون العملاء! أولا وقفوا فيزتي الي انا فاتحها اصلا بعد مع حجزت مبلغ ميتين وخمسين دينار عندهم، قبل چم يوم حطيت فلوس بالحساب، چن اتفاجأ انه الفيزا سحبت المبلغ من الحساب، مو هذي المشكله، المشكله انهم سددوا الفيزا من المبلغ المحجوز ووقفوها!! بدون اي اخطار!! ولا تلفون ولامسج!! الا چان دازيلي رسالة بالحمام الزاجل مادري!!

الحلقة الثانية

ماشي وقفتوا الڤيزا! ليش تسحبون فلوسي وتصفرون حسابي! مادري!

رحت لهم لأنهم بنك متقدم وماعندم تلفون اقصد قسم الڤيزا مالهم،"يمكن التلفون حرام!" وخذيت رقم والمشكله عندهم اربع خانات بس ماكوا الا موظف واحد! اخيراً يأ دوري، ليش وقفتو الفيزا؟ لأنك ماسددت صارلك شهرين! زين فرضا الواحد مسافر شلون يعني؟!! أخيرا كنسلت الڤيزا مره وحدة ورجعوا فلوسي بالحساب.

مشيت وانا ببالي بسكر حسابي من بيت التوهيق مره وحدة، أتفاجأ ان الحساب ليلحين صفر!!!

الحلقة الثالثة

رحت لهم ثاني يوم، وقلت لهم ابي المدير، انا ريال شكاي، قلت لهم شنو انا طالب من مكدونادز، مكدونادز لازم اجيك الطلب قبل لا امشي! لأنه 90% يكون الطلب غلط اوناقص! ،  وبعد ما دحلبوا السالفة ردوا الفلوس للحساب!

عاد هالمره وانا عند الباب دقيت على البنك وجيكت! مشى الحال.

نفس اليوم رد صفر الحساب مره ثانية!!! وليييييه انا ما عندي شغله غيرهم.

الحلقة الرابعة

دقيت على البنك وبعد الف سنه ضوئية ردو علي وقالولي سوينالك كتاب لي الڤيزا علشان يرجعون لك المبلغ!

واليوم طاف ٢٤ ساعة وما صار شي! دقيت مره ثانية قالولي لا ممكن تاخذ ٣ ايام، قلت له انا بسكر الحساب مره وحدة، اذا رحت الفرع مالي يرجعون الفلوس اذا بسكر الحساب! قالي اي!!!

الحلقة الخامسة

رحت البنك واخذت رقم وبعد نص ساعة يأ دوري وقلتهم السالفه قالي لازم تروح الڤيزا انا ما اقدر اسويلك شي لأنهم قسم بروحهم! ولا عندهم تلفون ولا شي! ولا حتى هو يقدر يتصل عليهم! والساعة وحدة وربع وما راح الحق عليهم لانهم يدوامون بس ثلاث ساعات ونص!! شنو البنك الي بس يفتح ثلاث ساعت ونص!!

والحين انا قاعد مفلس لي يوم الاحد، اللي راح افطر فيه عليهم!

اسامي قطاوتي الحاليين!

ماما عوده او يديدا اسميها مامي هي اللي شريتها في ديسمبر 2005 وبعدها بشهرين شريت عنتر الاول اللي يابت منه ٥ قطاوه ماتوا لأنهم ارتبطوا بحبلهم السري واختنقوا ! بعدين يابو ٤ بنات، شمه وحبيبه ودستي وهيزل.

مات عنتر الاول قبل لا يشوف بناته! وبعد ما كبروا البنات شريت عنتر الثاني، اللي اتزوج الكل وياب من مامي ٣ صبيان هم, باداي وبيوتيفل وحبيب، باداي مات بعد ما الدكتور شال عينه!

ومن دستي عندي كاروت توب وايج بلانت، ومن هيزل عندي توني، ومن شمة عندي گوچاني ولاتيه! وبالنسبة حق حبيبة عيالها انباعوا!

گوچاني حامل!

گوچاني (Gochani) قطوتي اللي احبها، بعد سلسلة عمليات الاغتصاب من العصابة اللي عندي واولهم ابوها عنتر بيه، بدى بطن گوچاني ينتفخ! يعني بعد خمس ست اسابيع بتييب لنا چم بيبي. لحد يسألني منو الابو! . اذا تبي بعدين سو فحص البصمة الوراثية وشوف منو اللي مسويها!

لوازم

عندي شوية لوازم، مو لوازم العائله!!  لوازم اقصد فيها الاشياء الي لازم اسويها!

لازم اسوي رجيم، اعوذ بالله من الرجيم!

لازم اسوي رياضة، بس الجو الخايس ما يساعد!

لازم اضبط شغلي، بس الكسل موهادني!

لازم ارتب اغراضي، اغراضي وااااااايد! باختصار لو اموت الورثه بيهيصوووون!

لازم اخفف القطاوة، ١٤ قطو يهدون الحيل، والميزانية والريحة ، مع اني ما اشم!

لازم اطير الطيارة مالتي الي ما طارت الا مرة وحدة

يقولون لي لازم اتزوج! انا ودي بس ما لقيت نصيبي بعد! وانا ما ودي اتزوج حسب الكتلوج، مع انه لو يصير فيه كتلوج صج حق الحريم والله يفكونا، وتصير السالفه اسهل!

لازم ايمع جم فلس، بس شلون والتكنلوجيا كل يوم وشي يديد، اوووه صح المشكله فيني كل يوم هواية يديدة!

لازم اقفل حوض السمك مالي الي صارله ست اشهر قيد الانشاء!

البقية لاحقاً

محل العاب!

اليوم شفت محل العاب اسمه غريب!!

قبسه في عيد ميلادي!!

اليوم عيد ميلادي ال٣٥

اليوم كان حده قبسه

اولا: راحت علي صلاة الفجر

ثانيا: بعد ما صحيت قلت اروح اشوف التسجيل بالمعهد العالي للفنون المسرحية ، بس السيارة طلعت خربانه, البطاريه مخنسة من الرطوبة الظاهر!

ثالثا: اخذت سيارة اخوي ورحت المعهد، لقيتهم بالفعل اليوم اول يوم تسجيل، بس الشروط ما تنطبق علي. معناته اني محتاج فيتامين واو!

رابعا: رحت البنك (بيت التطويل) علشان اشوف شسالفه الفيزا موقفينها واذا كلمتهم بالتلفون قالوا لازم تيي، المهم طلعوا موقفينها وماخذين فلوس الحجز وازياده بعد. بس علشان شهرين ما سددت!! فرضا انا مسافر يا حظي!! حق التوهق بس. بس ماشي سكرت الفيزا وفيزت الانترنت. وراح اسكر الحساب بكبره. واشوفلي بنك اسلامي ثاني, والا تعال صج ما في شي اسمه بنك اسلامي!

خامساً: رحت ادفع كاش حق الانترنت المقطوع، قالولي لازم ادفع مال شهرين مع انه منقطع من ثلاث اسابيع. يعني لازم ادفع فلوس حتى الوقت المقطوع. ولأنهم دايخين ومافي الا اثنين مليت من النطرة ومشيت.

والله يستر من باجي اليوم!

سجل حضورك! واذا حبيت علق!

تبي توقع، تبي تطق كرت، تبي تبصم، المهم عطني رايك وبكل صراحة.

Funny Q8i

بسم الله ابدأ

بسم الله الرحمن الرحيم

احب اسلم على كل من يقرا واقولهم حياكم الله.

هذا اول بلوج اسويه واتمنى التسامح من الكل.

في عندي هدف واحب اشارككم فيه، وهو انه يكون دمي خفيف عليكم.

ادري انه دمكم خفيف, علشان جذيه قاعدين تقرون.

بالمناسبه كلامي موجه للبنات والرجال. بس لغتنا ما تسمح!

اذا ليلحين تقرون معناته انه بالكم طويل, بس انشالله بتضحكون قريباً