الاثنين، 26 يناير، 2009

المعلمة قوچاني!


قبل مدة قوچاني ولدت، وكلموني وايد ناس يبون يشترون بس اقول لهم نطروا لما يكبرون شوي، يعني انا عادةً ابيع بعد عمر اربع خمس اسابيع، لما يبتدون ياكلون ويركضون، بس جلب فيني صديق الا تبيعني وحدة الحين، مع اني قلت له انها ليلحين ترضع وحيل صغيرة، فقال لي عادي اللي بياخذونها يعرفون يتصرفون وياها!


سلمت أمري لله وبعته القطوة، بس اييكم العلم، قوچاني كانت والدة اربع، والحين نقصو وحدة، والمسكينة هالمرة شاده حيلها وياهم وقاعدة ترضعم تمام ومجابلتهم عدل، يعني صايرة ربت بيت درجة اولى، مع انه اخر مرة ولدت يابت اربعه، مات منهم ثلاث والرابع قطيته عند خالتها حبيبة ترضعه، بس هالمرة صايرة مرا.


الحين تعال حل المشكلة:

قوجاني:"واحد، اتنين، تلاتة، !!!!!!! فين الرابعه فيييين بنتي الرابعة؟ ضنايا، قيبووولي ضنايا"

مادي شلون ومن وين يالها الاستنتاج انه "هيزل" اكلت او باقت بنتها! لا تستغربون، الحالتين صاروا عندي! مرة "ايديدا" كلت بنتها اللي عمرها اسبوع! وساعات كانت تبوق عيال بناتها وتحطهم ويا عيالها جنه ماكو شي صاير

ايديدا:"لا عادي عادي علشان اخاويهم من الرضاع!"


قوچاني شاكة بـ"هيزل" اللي تصير خالتها ومرت ابوها وبنفس الوقت شريجتها! ومن ذاك اليوم اللي بعت فيه القطوة واهي صايرة شرية وما تتحاجى!


أنا:"يا بنت الحلال! طولي بالج"

قوچاني: "ماريد ماريد الا اكسر ذيلها بنت البزونه!"

أنا: "الحين انتي مو مساع تتحجين مصري؟! شاللي قلبج عراقي؟ شنو مسوية بساط الفقر؟!"

قوچاني: "چب زين، انت بس تتصيد!"


طبعا انا ما قلتلها اني بعت بنتها! خليتها على عماها وصارت بويه "هيزل"!


بس شكلي انا اللي باكلها من الهوشات كل يوم، تقول شرايج!


بس صح هم شرايج من قبل! بس الحين صار بينهم طار، اقصد ثار!

الخميس، 22 يناير، 2009

طريق بابا!

تعبت من كثر ما ضحكت على هالفيديو، وقلت خل اتعبكم وياي! قصدي اضحكم D:


السبت، 17 يناير، 2009

تو الناس!

happy holidays

طافكم في ليلة راس السنة، خووووش مشهد، حده متأخر البوست أدري Tongue out

كنت بسوق شرق، وانا ماروح سوق شرق الا اذا بروح مركز سلطان،لأنه الافينيوز قضى عليه!

حست شوية بالمركز، وكالعادة عصبت، لأني دايما احوس على ما اعرف اي شي جم سعرة!At wits end

إلا المخ حاطين عليه سعر!

SC-Brain
SC-Lamb Eggs

وهذا بعد حاطين عليه سعر، لأنه محد راح يسأل ويقول "بجم بيض الخروف؟"!!! Sick

بعدها قلت خل اطق لي فرة بالسوق، وكنت قاعد اسولف مع صديق عالتلفون، بما انه كان اخر يوم بالشهر وبخلص الباجي من الرصيد مال الباكج قبل لا يروح علي Call me

FatBiker

علشان ما يكون هذا مصيري، طلعت من مركز سلطان ومريت GNC فوق وقعدت اطالع الحبوب، اشوف لي شي يساعد الرجيم، اكتشفت بالصدفة منتج اسمه ليبو ٦ سعرة ١٥ دينار، مع اني قبل يومين كنت بالسيتي سنتر وريال شراه جدامي ب٢٥ فأشوه انه مو انا جان مت قهر، وحسافه انه مو رفيجي ولا چان دقيت عليه وضحكت ضحك اليهد!Rolling on the floor والمراه اللي تبيع تقول له هذي اخر حبة، وستايل هذا المنتج خاشينه داخل بس حق الحبايب!

ويمكن لو ما كان اخر حبة جان خذيتلي واحد!

عاد فكرت اني اشتريه، بس بما انه فيه كمية منه، قلت خل اجيك عليه بالانترنت اول، انا من النوع اللي يحب يجيك كل شي بالنت، السعر، المواصفات، راي الناس، وشنو امكانية اني احصلة بسعر ارخص، وهذي اهم نقطة Rolling on the floor

لأنه محد فينا عنده استعداد يدفع اكثر في أي شي الا اذا فيه ميزه شكبرها، او انه ماله خلق ينطر، او يخاف من النچلات!

عادي انا احب المخاطرة، قبل مده كنت طالب حبوب من امازون، وحست على ما طلعتهم من الجمارك ووزارة الصحة، بس بالنهاية كانوا ثلث سعرهم بالكويت!

بس حسافة بعضهم كان تاريخ الانتهاء ماله قريب!

GNC-Slimming patch

لقيت هاللصقة، الواحد يلصقها ويضعف!

شهاللصقة الي ب22 دينار!

تيب ب150 فلس من البقالة واتييب فيها حلجي وبطني وبالمرة بوكي علشان ما اطلب من المطعم!

نرجع مره ثانية وين كنت؟

اي، قلت بعدين اشوفه، وطلعت من المحل لأنه ياني تلفون وكنت اسولف واتمشى، اذكر قبل كنت آكل وانا أتمشى، غريبه من زمان ما سويتها، شورما وسفن وانا قاعد اتمشى!

وانا قاعد اتمشى في ممرات سوق شرق، مريت بين هوشه! كل اللي اذكرة شي مثل "احترم نفسك احسلّك،،،، يالله انقلعي انقلعي"!

كانت وحده قاعده تزف اثنين، والاثنين هذيلا كانو لابسين مثل مثل! الحمدلله والشكر، شنو الأخوة فرقة؟!

المهم طفتهم وجدام شوية ولا في امن بو لاسلكي، قلت له في هوشه ورا وأشرت له ومشيت ، وبعد شويا ولا هذيلا يركضون يمي ويا قمصانهم المخططة ابيض واسود اللي جنهم من مساجين امريكا، بس ناقصهم السلسلة ام كرة حديدية!

سويت لفه بالسوق، بعدين قلت خل ارجع مركز سلطان اخذ لي جم شغلة، والساعة كانت ٩ ليلة راس السنة والبيبان تسكرت! شالسالفة؟ مادري!

الحين صارت السالفة، على ما لقيت لي باب اطلع منه من سوق شرق وكنت متوجه حق مركز سلطان، شفت من بعيد لوية عند الباب، وايد شباب، وأمن!

استوعبت انهم ما يدششون الا عايلات، اوتوماتيكيا وانا قاعد امشي كان في يمي وحدة منقبة وامها الحجية، جك بك مشيت بينهم والتوقيت كان عجيييب، يعني بالضبط صارت هذي مرتي وهذي عمتي!

عاد كنت ساكب حزتهاCool، المهم انا ويا عقلي الباطن تقمصت شخصية انه هذي مرتي وكنت متجهز اذا قالولي وين رايح بقول "نعم، نعم؟!!، الأهل!" Nerd

SC-Family only

بس محد سألني، الظاهر اني كنت جايد الدور، كل هذا وانا قاعد اتكلم بالتلفونOn the phone، يعني باختصار كان مالي حل، حتى واحنا قاعد اندش جنه واحد من الأمن قال "شوية شباب خل العايلة تدش"!

المهم انا دشيت منيه و ورررررر، لي داخل بسرعه بسرعه، زين ما جكوني، بس صراحة ضميري انبني وايد، فقررت اني اصلح غلطتي،

فتزوجت المرا!!! اي خطبتها من الكاشير، والمهر كان بالكي نت! وبالمرة حصلت 5000 نقطة ببطاقة الريوردز!

الجمعة، 16 يناير، 2009

موبايل مي


بعد ما طورت الآيفون صار في معنى اكثر حق استخدامي حق خدمة موبايل مي مالت ابل، واللي ما يعرفها فهي عباره عن مجموعة خدمات منها ايميل وويب سايت تحط فيها اللي تبي من صور، بلوق، كالندر، إلخ إلخ إلخ،،،

اهم شي عندي الكالندر يعني الرزنامة، لأني احط فيها دايماً الأشياء اللي سويتها والأشياء اللي ابي اسويها علشان اعرف متى سويت ومتى راح اسوي اي شي. شريت، بعت، طقيت احد خخخخخ لا مو من النوع اللي يتهاوش p;

انا اكتب بالكالندر من 2004 ليلحين، يعني اقدر اطلع متى شريت أي شي، مثلا جم بريد اكلت، وجم مره سويت دايت وجم مرة خربته! منو سلفته ومنو أهديته، ومنو ليلحييييين ما رجع الفلوووووس!! الحچي لج يا جارة اذا قاعد تقرا!! ثلاث سنيييييين حرام عليك!!

في البداية كنت اكتب على رزنامة العجيري، وبعد سنة صرت اكتب باللابتوب، وايد احسن علشان البحث السريع، وعلى مدار الثلاث سنين اللي طافوا كنت اسنّك مع الموبايل، كان عندي آيميت جاس جار، وبعدين دشيت بالآيفون، اول واحد فتح الآيفون بالكويت(Hardware) كان آنا والعياذ بالله من هالكلمة، المهم مو هذا موضوعي، موضوعي اني كنت اسنك الكالندر مع الآيفون عن طريق الآيتونز، بس الحين مع اشتراك موابايل مي والڤيرجن اليديد من الآيفون صار اي شي اضيفه بالآيفون يبين بالكمبيوتر تلقائيا، من أسامي، أرقام تلفونات، مواعيد، وهم بالعكس.

حتى لو يضيع الآيفون، عادي، ما احاتي اي معلومة لأنه تتسنّك مع الموبايل مي كلاود اللي اهيا الغيمة اللي طالعين لنا فيها الحين، بدال ما يقولون انترنت صار اسمها غيمة!!

يعني اذا انترنتي صار بطيء بصلي صلات الاستسقاء يمكن تمطر وتصير النت أسرع!

أمس قلت بما إني بسنّك الأسامي، فقعدت لها قعدة على الكمبيوتر في برنامج الأدرس بووك، واشوف الأرقام اللي من سنة الطبعة، واصلح الأرقام الي ناقصة الزيادة، واشيل البيرث دي الي الويندوز حطه على كيفه! وامسح أسامي الناس اللي ما اذكرهم!! والناس اللي ماتوا اشيلهم، الله يرحمنا ويرحمهم.

طبعا الموابايل مي يكلف 100$ بالسنة، الا اذا تشتريه من امازون يصير ب69$ وتحصل 20 قيقا تخزن فيها اللي تبي! هم غالي بس كافي سالفة التسنيك مع الآيفون (;

هذا باختصار،،،
وتحياّT

الاثنين، 12 يناير، 2009

اخيراً طورته!


امس قررت بعد طول انتظار اني اطور أفيوني!! أقصد آيفوني، والسبب في تأخري كان الكسل عن تفريغ الملفات الزايده فيه يمين ويسار.

أول شي نقلت كل شي بالجهاز، بعدين مسحته لعنت والديه (ستيڤ جوبز وبيل قيتس!) وبعدين طورته لي ڤيرجن ٢,٢ واللزي منو!

وأهم شي اني ركبت العربي من النت، كلفني ثلاثين دولار، لا مو ثلاثين! تسعة وعشرين دولار وتسعة وتسعين سنت، يزاه الله خير اللي طيلحي هالسنت!......لا هنت!

الحين اقدر ادز بوستات من الآيفون بالعربي لا وأعلق بعد! يعني من أرض الحدث الملاقة بتصير حار بحار p;

الجمعة، 9 يناير، 2009

مخك وين راح!


اذا تبي تعرف مخك شلون يفكر قول لي المرا الي بالفيديو تلف مع أو عكس عقارب الساعة؟

بعضنا بيشوفها مع عقارب الساعه وبعضنا بيشوفها عكس والشاطر اللي يقدر ينقي ويلفها على كيفه.

واا خزياه! 2

 raicartoon

جريدة الرأي العام! أنعم وأكرم!

الخميس، 8 يناير، 2009

ماكو بوك يشيل فلوسة!


منو تشتريلي هاللاب توب واحقق لها ثلاث امنيات؟

لا مو تصدقون p;

مو وايد اسمع عن الهدايا القوية، وطبعا ما توصل حق جذيه الا اذا مرافج لك سبيطية من بنات الهوامير، ولا لابتوب سعره فوق الألف أمك تحصله هدية، خوش هدية!، يعني بالضبط قيمة شبكة، يا ترى يصير الواحد يقدم لابتوب كشبكة؟

"احنا بنتنا مو اقل من ثلاثة فاصلة خمسة قيقا هيرتز، بعدين يبيلها انترنت وايرات لس مو اقل من اثنينا ميقا"!!

الثلاثاء، 6 يناير، 2009

واا خزياه!!


كتب فؤاد الهاشم في مقالته بتاريخ 6 يناير 2009

".. صحيفة «الدستور» الاردنية نشرت مقالا مليئا بالشتائم «اللوطية» ذاتها كتبه فلسطيني يدعى «ماهر أبو طير»، ويبدو ان الذي كتب شهادة ميلاده قد نسي أن يضع «نقطة» فوق حرف.. «الراء»!!"

 مع اني ضحكت! بس استغربت ان هالكلام انكتب في جريدة، يا ترى لو اكتب جذيه بمدونتي راح تنتقدوني ولا تستانسون؟

الجمعة، 2 يناير، 2009

مبروك ماكو حرب عالمية ثالثة!



تخيل هذا الكلام مسجل قبل ثلاثين سنة!