ادري اغط وايد بس شسوي موووو ملحق، اسمعوا بس البوس كاست الطيب وادعوا لي p;
اذا تبي تقطع الزقاير، او تبي تضعف اسمع لي الاخير، وشوف اذا راح تستفيد شي، واذا ما استفدت على الأقل اسمك ضحكت p;
وتحيّاT
(تحديث: سمعه باليوتيوب)
الأربعاء، 31 ديسمبر 2008
الخميس، 18 ديسمبر 2008
بان كيك Free!!
اليوم طق براسي اكل بان كيك، بما انه الحكومة استقالت وانقبلت استقالتها فالدستور مالي ببروزه واعلقه ليما يتم التشكيل اليديد p;
المهم رحت برايم اند توست (بربلشس كله منج p; ) وما كان في وايد ناس، طلبت بلوبيري بان كيك مع ديكاف كافيه لاتيه، واستغربت من شكل الكوب، جنه كوب بلاستك ومايع لأنه القهوة حييييل حاره! حتى قعدت مده يالله استوعبت انها حركة مو صج! p;
كنت مستعيل حيل، وطلبت الجيك مبجر.
بعد ما مسحت الصحن ليما ويهي صار يبين فيه، وحتى عدلت الغترة مالتي بالمرة، وطليت ببوكي ولا فيه دينار ونص، وحسابي كان ثلاثه وستمية فلس! فعطيتم الكرت الكي نت.
الحين انا مستعيل بمشي والمكينه عصلقت، وقعدت عشر دقايق على هالحال، اخر شي قلت للويتر خلاص خلي الهندي ايي وياي انا صافط ورا يم البنك، وإذا بشي غريب يصير، دن دن دن داااااااا
كان في اخت قاعدة بالزاوية والظاهر شافت السالفة، وعلى ما يبدو اني كسرت خاطرها، مع اني ما بجيت وايد بس قعدت اصارخ واقول " ابي اميييييي، ابي اميييي ، والله عندي فلوس والله عندي فلوس واااا وااااا بس لا تيييبووون الشرطه"
(اخاف تصدقون بس أي شي بالأحمر مو صج)
فالاخت يت وادفعت عني، وانا اقول لها لا لا عادي الحين اييب الفلوس وهيا لا، أبد، شدعوة، عادي! فقلت لها خلاص الحين اسحب واييب افلوسج خمس دقايق بس مو تروحييين!
ورحت لي سيارتي بسرعه بسرعه وكان البنك قريب سحبت فلوس، وقلت خل اخذ سيارتي بالمرة، ورحت و سكرت عالسيارات وصفطت جدام المحل عالسريع، ورحت للكاشير وقلت له عطني خرده عشرة جان يعطيني خمستين! وماكان عنده دنانير!
جان اشق الخمسة واكتب على نصها اذا تبين النص الثاني دقي على هالرقم وعطيته اياها خخخخخخ اخاف صج بس! (مره ثانية مو صج)
المهم عطيته الخمسة وقلت له عطها حق الي قاعدة بالزاوية، وشلعت، ورررررر!
تقول سندريلا الساعه اثنعش!
طلعت ورحت بسرعة بسرعة ونسيت اني صافط جدام المحل، ليلحين بالي ان سيارتي بالموقف اللي ورا، وبنص الطريج تذكرت!
السالفه اني صج كنت مستعيل ولازم اروح، فرجعت ولا الاخت قاعد اتدورني برا، وماكو فايدة طاحت علي، وانا عاد كنت متجه للسيارة جني ما شوفها، وهي كانت بنص الطريج، فألقت القبض علي بالجرم المشهود p;
الحين تعال فجج:
هي: ....... (ماذكر الحجي لاني كنت بلاك اوت حزتها)
انا: لا عادي عادي فلوسج هذي
هي:.... لا مافيها شي انا ما بغيتك تتأخر شكلك مستعيل، بعدين انا بس ٣ دنانير دفعت! (مادري يمكن جذيه قالت!)
انا: لا عادي مو مشكله، واذا مصرة عطيني دينار!!!
هي: لا افا عليك لا تفشلني، اخذ الخمسة اخذ الخمسة! ارجوك!
قالت حجي وايد ما أذكره، بس هي اصرت، لا الحت، لا اصرت، لأنه اصرت تصر ،، الحاحاً!! ، بختصار اخذت الخمسة وما أذكر اذا شكرتها ولا لأ بس حدي كنت منحرج، وأبي أخلع p;
والحين ابي اقول شكراً ضرب مليون للأخت الكريمة، بس ما راح ارتاح الا اذا رديت الفلوس!
وتحيّاT
الأربعاء، 17 ديسمبر 2008
عين وحدة ماتصفق!
صج مصخت!
صار لي تسع اشهر وانا ناطر الدور "الوهمي" علشان اسوي عملية زراعه القرنية في عيني اليسار، اول شي الدكتورة قالت لي انطر في جهاز ليزر يديد شريناه ويبيلا شوي ويوصل، وبعد ثلاث اشهر قالت اي بعد ماوصل، المناقصه كنسلوها بعد ما رست وسووها مره ثانية، قلت لها ماني ناطر الجهاز، ابي اسوي اللي كنتو تسوونه قبل، قالت اوكي يبيلك عيل شهرين ثلاثه على ما اييلك الدور، مع انها اول مره قالت لاااا عادري القرنيات عندنا كل اسبوع يوصلون وعادي، بعدين السالفه طلع فيها دور، والحين طاف ست اشهر وما يأ دوري! ومحد دق علي.
قلت خل امر اشوف شالسالفة، اروح حق اخت "وسمية" مو موجودة وطبعا تلفونها انسا انها ترد عليه. سويت موعد الشهر الي طاف وعطوني بعد شهرين يعني يناير، وبالصدفة شفت الدكتورة برا وسألتها "ها وصل الجهاز" وتقول اي وقريبا بيي دوري! وما يندرى.
يا جماعة اذا احد عنده واسطه ضبطوني، يمكن اطلع بوستات احلى اذا اشوف بعينين (;
وبالنهاية ما اقول إلا "بس يا بحر"
اقصد "مصخت يا بحر"
الخميس، 11 ديسمبر 2008
ما چذَّب خبر p;
Thanks Purplecious ;D
هالخبزتين ودايت سفن بدينارين ونص!
من عذره اللي بالرسوم المتحركه وصل 60$ مو حاط مليون وحده الأخ D:
بس لذيذ، وانا لولا قانون الطواريء اللي بالمادة ٢٤ من الدستور مالي جان ما وطوطت صوب هالمطعم.
عاد كنت توني خالص من ممشى مرينا جان اقرا تعليق Purplecious وسيييييده لي المطعم، مو كنت مو متريق ولا متغدي فعادي الواحد يفصل!
صاير بوستات على الهوا حار بحار، مثل البان كيك حار p;
وعاش الدستور (;
بان كيك خالي الدسم هم يمتن p;
تذكرون هالرسوم المتحركة؟
الشياب اللي مثلي احم احم يذكرون اكيد ايام الطفوله بالثمانينات، طبعا في اللي طفولتهم كانت بالتسعينات، عادي جنك ما تدري p;
المهم كان حده يشهي البان كيك، وماكلته الا لما كبرت، بس عمري ما حصلت الاحساس مال الرسوم، يعني الرسوم مالها شغل بالبان كيك، يعني صج يخليك تحس انه شي عجيب ولذيذ! يمكن انا ليلحين ما مر علي بان كيك يعطيك نفس الاحساس اللي بالرسوم!
ساعات وايد اشوف اكل بالرسوم يشهي بس بالصج مو نفس الطعم، يعني تطالع الفيديو تقول الله ابييييه، تجربه! لا مو نفسه، لأنه المخ يخليك تتصور طعم على كيفه وعلى حسب الصورة!
انا بالمطاعم افضل الصور اكثر من الكتابه بالمينيو، ابي اشوف مالي خلق اقرأ شنو مكونات كل طبخه، سورري انا ياي اكل ولا بطالع شيف رمزي؟!
وتحيّاT
الأربعاء، 10 ديسمبر 2008
قطاوة أجار للتملك!
حطيت اعلان حق قطاوة وقلت خل اصورهم علشان يشوفونهم على الطبيعة، التصوير والتقطيع على السريع، والاغنية مالها شغل بالطبخة بس مشي حالك آه خخخخخ
وتحيّاT
الاثنين، 8 ديسمبر 2008
ڤيڤا اخيراً
بعد ساعتين هياته بالمطار وصل دوري p;
خليته تعبئه ليما يبين شنو وضعهم، دفعت الخمستعش لأنه راح أتكلم فيهم، اما اذا فواتير فيروحون عليك! ويقولون ماكو رسوووووم!!!!!!!
هم يقولون ماكو انترنت بس اول مافتحته يتني مسج الستنق وفيها انترنت، وجربته واشتغل، صج بطيء بس احسن من النطره، ومو ببلاش! مع اني دقيت واستفسرت وقالي المسؤول انه سعر الانترنت فلس حق كل كيلو يعني دينار بالميقا، الا اني لما شبكت سحبت وايد وبس خذا ستين فلس!
بعد يلبيلهم مده على ما يتسنعون!
ڤيڤا المطار
هذا رقمي والدور واصل ٢١٥ يعني انطر، شوف الرقم شلون مكتوب باليد مع انه فيه مكينه أرقام ولوحات بس مو شغاله!
شنو بعد مو شغال يا ترى!!!
كل عام وانتو مستانسين :)
القوري والقلاصات مصنوعين من الككاو، علشان تاكل وتشرب بنفس الوقك p;
وعيدكم مبارك :)
الأحد، 7 ديسمبر 2008
بركات اليوم المفتوح!
هذيلا مو ابراج الكويت!
من طول الغيبات، ياب الغنايم، هذي الصورة من الاسبوع الماضي، اذا تبي تدري وين تروح 
طقيت 3 ولو في نوع رابع جان ربعتها، مزاجي ارتفع مع رفعت السكر 
يا ريت لو الزواج نفس البريد، على كيفك تاكل وتستانس وتنوع بالحلال 
لو يحصل لي اربع بنفس الوقت ماقول لأ، اقصد البريد يعني 
كلنا نبي ننوع "البريد" مووو؟ 
السبت، 6 ديسمبر 2008
عيش اللخبطه مع ڤيڤا!!
تكلو تكلوو اوويييوووو!
يا هلا يا هلا يا هلا!
اليوم الصبح رحت ارض المعارض، قالولي الساعة اربع ونص يفتحون!
دقيت عليهم لقيتهم حاطين رساله تقول روح يوريكا!
رحت يوريكا السالمية الظهر مسكر!
رحت المعرض عالاربع والازدحام حده مصخرة شوف الفيديو
ماكو تنظيم ولا اسلوب! صراخ، وناس تتهاوش، مادري على شنو، انا بس قاعد اضحك واصور خخخخخ
ودي اعرف ليش جذيه، هذا وماكو لا سحب ولا هدايا ولا عرض محدود الكمية ولا حتى قلم هدية، زين مو هدية قلم بوخيط اللي يصير مربوط علشان محد ياخذة هم ماكو!
بالغصب يالله خذيت لي عقد، وتسلفت قلم من واحد وكتبت (وصيتي) باقي اصور المدنية وهني حد المصخرة حسافه راح علي مشهد حده عجيب ما يتطوف بس ما مداني اصوره، هندي متقلقص، ما اقدر اوصف! حده يضحك D;
بعدها مليت وقلت انا شلي بهالطلايب، خلى اروح يوريكا، واخلص شغلي هناك، الحين تعال فجج، رحت الباب الي دشيت منه، لقيته مسكر والناس قاعده تنطر! شنو ناطرين الخبز؟! الجام مال الباب تشلخ!
رحت يوريكا الشويخ جان يقولون لي ماكو عندنا! طلعت غلطه! المشكله انها كانت محطوطه بالرد الآلي مالهم، قال لي في بالمطار ومرينا مول وهذي صورة المرينا مول انا كنت في الظهاري مافي احد!
شالسالفه؟ ماكو تخطيط؟ أي شي يعني؟! كان ممكن يتفادون هذا كله بأنهم اول شي يوزعون العقود مبجر، من برا برا، المسج الي دازينها حق الناس يقولون لهم ييبو صور البطاقات بدال الحوسه على الطباعه، وأصلا لو يفهمون جان وزعوا العقود مبجر بالمجمعات، علشان الواحد ايي عالسريع. ولو عندهم شويه ذكاء الناس الي حاجزه ارقام المفروض ايي يعطيهم البطاقه ويوقع وياخذ الشريحه ويمشي! بس بعدها ما وصلنا حق هالمرحلة!
ولو كان عندهم شوية فهامية جان دزو الشرايح بالبريد! بس تدري شلون عيش اللخبطه!
الجمعة، 5 ديسمبر 2008
الخميس، 4 ديسمبر 2008
حيلهم بينهم!
ونـــــــــــــاسه!
ڤيڤا اعلنت الحرب على المنافسين، بأول خازوق تسويه وهو انك تستقبل ببلاش، وطبعاً الثانين اتبعوهم كالمجانين، يعني اذا تقدرون تسوون جذيه ليش مو من زمان يعني؟!
الحين تقدر ترد على الموبايل ولا تحاتي، الا اذا مالك خلق ام العيال! كل شوي بتدق عليك
"هو: ها في شي؟"
"المدام: لا والله بسولف بس"
انا متأكد انه ارباح الشركات بتقل على الأقل 70% لأن الناس الحين راح يستثمرون تلفونات البيت الي حمضت.
قبل الواحد يستحي يدق من تلفون البيت، ويتحسف يدق من الموبايل، بس الحين اجرخ على راحتك.
الخوف الحين وزارة المواصلات ما تبتدي تجرج على مكالمات البيت، يعني عسى ما تقلب السالفه عايدي!
طبعا الرضيعه حدهم مهيصين، خلاص قول وداعا للميتين دينار بالشهر p;
يعني مالك الا اثنين، يا انت تدق من تلفون البيت، يا هي!
وبالحالتين محد بيدفع!
يعني قزروها ميسدات وتلفون بيت، واذا اثنيناتكم برا البيت قزورها مسجات!
ولا لأ مسجات تخسر اكثر من المكالمات، خلاص شوف لك باكج صغيرون حق المهمات الصعبه!
وقالولي انه عند ڤيڤا تقدر تختار رقم واحد ٢٤ ساعة ببلاش (;
الأربعاء، 3 ديسمبر 2008
خلطبيطه!
حياتي صايره ملخبطه!
ولازم ابتدي ارتبها، البوس كاست لخبطلي كل حسباتي التدوينية علشان جذيه ماصرت ادون كثر قبل! لأني كل ما افكر بسالفه اقول اييييي خلها حق البوس كاست!
وهم الرجيم مالي مأثر بعد! أكيد نقص السكريات أثر على الحس التدويني مالي!
والرياضه بعد ماخذه من وقتي واذا رجعت البيت اكون هلكان فأصير وين والكيبورد وين!
وقبل كنت كلا على الاب توب بالفراش ومن بعته صرت لازم اقعد على الأيماك بالمكتب!
بدينا بالنقزات p;
وبالنهايه المدونه صارت تعاني من نقص ملحوظ بالبوسات وبناءاً عليه قاعد افكر اني اصك المدونه!
كعكعكع لا اتغشمر!
يا ريت لو اسمع مقترحاتكم!
انا مفكر اني الزم نفسي بكم من البوستات يومي حتى لو عن صوري المحمضه!
ساعات التزم الصمت، بس ممكن الصور تعبر عن تفكيري!
ومو من الضروري انك تعلق على كل بوست! ساعات احس اني لازم اعلق عند بعض المدونات مع اني مو فاهم الحجي! بالضبط جني اطق كرت الدوام! يعني شوفني ترى دشيت وقريت خخخخخ
البلوقرز حبايبي وما بينا مجاملات فتيك إت إيزي
وسوو حسابكم بشخلكم بوستات بكميات اكبر وسعرات حرارية اقل (;
وبالنسبه حق البوس كاست ياريت لو تفيدوني بالاجابه على الاستبيان اللي راح يخليني اعرف شنو مصيره؟ عاد مسجل واحد يديد بس محتار!
آرائكم ومقترحاتكم بالنسبه حق البوس كاست
تحويشة العمر بهالسلندر!
الريال مشتكى على زوجته بالمخفر انها بايقه سلندرغاز!!! يعني بصراحه عمري ما شفت عبط مثل هذا!
اذا كان سلندر الغاز لهالدرجه مهم ليش مو حاطه بالتجوري؟!
والغريب انه بنفس الصفحه مالت الجريده هالخبر عن سلندر غاز متروس حشيش مقطوط بالعبدلي!
هل ممكن لو يحققون مع مرت الريال انها تقول "قطيته بالعبدلي!"
الثلاثاء، 25 نوفمبر 2008
تحبه اكثر ولا الله؟!
قبل لا اسويها سالفه قلت استشير ولا خاب من استشار
كنت بمكدونالدز بمنطقة السلام، وكنت ناطر سندويجتي الخاصة كالعادة تطول!، وشدني شكل الرسومات والكتابه الهيروغليفية الي بالأرضيه فصورتها.
واكتشفت هالاكتشاف الخطير
وهذي صورة ثانية
يعني يا اما هذا لفظ الجلاله ولا انا مخرف!!!
منو المسؤول؟ مكدونالدز او الشركه اللي مستورده الأرضية! ما استغرب اذا كانت الارضية صناعه صينية! متعودين على هالسوالف منهم من قبل!
شنو بقى بعد؟ والله اخاف على يوم أيي اكل السندويجه والقى عليها بعد لفظ الجلاله!
الأحد، 23 نوفمبر 2008
المدونة ليست للبيع!
لو يتلك مكالمة او مسج من تلفون ماسي أو زمردجي مثلا ويقولون لك بجم تبيع المدونه مالتك؟
هذا شيك على بياض، وحط الرقم اللي تبيه!
يا ترى شنو تكون ردة فعلك؟
واذا مو شيك على بياض، هل تبيع وبجم؟!
الاثنين، 17 نوفمبر 2008
رأيتك واسترئيتك!
صارلي اسبوع ما كتبت شي! ولا سجلت شي!
اكيد واحد عارف نفسه عدل اهو اللي صاكني عين!
فقلت احسن شي اني ابخر البلوق عسى تنفج العقده!
يعني شسوي بعد؟ اييب ملا يقرا على البلوق؟
©©©
الماك بوك اير مالي بعته وقلت اقزرها بالأي بوك القديم مالي!
بس الكوننكتر مالت الكهربا تعبانه يعني لازم اظل ماسكها علشان يشتغل!
والبطارية ميته! اليوم قلت بتفرغ له!
الحين لازم اطلب القطعه من امريكا بحروه الثلاثين دولار
ومني ليما توصل القطعه رايح يظل المسكين مكشوف العوره!
كيفه! من قال له يخترب!
الأحد، 9 نوفمبر 2008
دستوري وكيفي، ولأ! ماني مستقيل!
اليوم بعد ما طلعت من الحلاق قلت خل اشوف البقالة الي يمه اذا يابو من الآي سكريم الي خبركم.
بس غيرو الجيس ماله!
حظي زين ومو زين، لقيتهم يايبينه، بس اغلبهم كانوا متلعوزين شوي، المهم حصلتلي على اثنينة، ولقيت فيه واحد شكله عجيب بعد قلت اجربه بالمره.
طبعا بتقولون لي وييييين الدستوور يا بودستوور؟
اقول لكم شغله
بما إني انا الشعب
وآنا الحكومه
وآنا هم بعد مجلس الأمة
الخاص فيني وبدستوور رجيمي
فأقدر انا اغيره حسب مزاجي
كيفي!
فحبيت اني اضيف مادة يديدة حق الدستوور كما يلي:
مادة اربعوعشرين:
في حالة الطوارئ يسمح باكل منتج جديد بشرط انه يكون اول مره أذوقه أو اذا رفيجي چلّب الا الا اعزمك، على ان لا تزيد حالة الطوارئ عن ثلاث مرات بالشهر
وبجذيه اقدر اقول اني مازلت محافظ على الدستوور ومحترمه طول ما انا قاعد امشيه على كيفي! p;
السبت، 8 نوفمبر 2008
ثالث بوس كاست طاح باليوتيوب (تحديث: اليوتيوب دايخ)
ممكن تنشر البسمه؟
(تحديث:اكتشفت اليوم انه اليوتيوب الدايخين قاصين اخر دقيقه من البوس كاست مع انها ما طافت العشر دقايق!! يعني بالله بذمتكم شنو شعور الواحد اذا احد قاطعه وهوا بآخر دقيقه؟!!!)
(تحديث ثاني: خلاص صلحت اليوتيوب والحين صار كامل)
هذي ضروسي بعد ٨ اشهر من التقويم الشفاف
الأربعاء، 5 نوفمبر 2008
اليوم المفتوح، يرد الروح! (تحديث)
قبل اي شي احب ابشركم انه البوس كاست مالي صار موجود على الايتونز ستور بس سو بحث Funny Q8i وراح تلاقيني موجود وتقدر تشترك، واتمنى اذا احد كان عنده اكاونت عندهم انه يسوي ريفيو عن البوس كاست واكون له من الشاكرين
واليوم نزلت البوس كاست الثالث
وليلحين ما سويته على اليوتيوب، تقدر تسمعه بالآيتونز
اول امس كان اول اثنين بالشهر والي يعتبر حسب الدستوور مالي هو اليوم المفتوح واللي اقدر اكل في اللي ابي على كيفي ومحد له شغل 
وانا على حظي مانتبهت الا المغرب، المهم قلت خل الحق على باجي اليوم
اول شي مريت محل قيصر بقرطبة وخذيت لي نص درزن بيتزا وصمونة مسحب وصمونة خضار، اللي ما يعرفهم ترا عندنهم خوش صمونات صغار ولذيذين
وبعدها قلت مايبيله الحين الا اثنينا برييد على مزاجي من محل عصير جمعية العديلية يم يم عم عم
بعدها قلت خل امر اخذلي اكل حق القطاوة من سوق الحمام اللي يم سوق اليَمعه للي مايدري!
المكان يخلو من البواليع وكانت غرقة
بعدها رحت الافينيوز وكان الازدحام ماله والي
لقيت محل عاليمين وصفطت عنده وقلت خل ادش اطل شويه عن الفشلة
عجبني الشاور هذا، في راديو وتلفون ومساج وبخار بس ناقصه انترنت وستلايت وميكروويف وانام داخلة
ان شاء الله راح اشتريه وحطه بغرفه النوم (صج)
علشان اول ما اقعد من النوم انط سيده بالفراش واتنشف
وهم بعد اذا اتزوجت ان شاء الله اقعد من النوم على صوت الشاور ومنظر حلو 
او على صوت شخير مرتي 
بعدها رحت الافينيوز وقلت اطق لي دوناتين بما اني عندي مدونتين
حده حوسه كريسبي، اول شي طلبت حبتين باكلهم على الطاوله الاخ الفلبيني حطهم بجيس، بعدين ييت احاسب قالتلي الكاشيره الفلبينية 800 فلس، عطيتها خمسة جان تقولي ماتبي ماي؟ قلت مابي ماي! ما عندك 800 فلس قلت ماعندي 800 فلس جان تتل الجيس وتقول ما اقدر ابيعك عيل! جان اناظرها بعين 
جان تقول اوكي وتبطل المكينه وتطلع الباجي!!!!!!!
الحين قلت لها ممكن صحن؟! قالت ماعندنا صحن! جان اهدها واروح اقعد على الطاولة، ولا مرا قاعدة يمي عندها صينية، رديت قلت لها ممكن صينية؟ قالت لي قول جذي من زمان!!!!!!!!!!!!!!!!!!!
حد التخلف! يعني انا لو مو اليوم هو اليوم المفتوح جان لبستها الدونات، بس حرام اخرب اليوم عليها!
السبت، 1 نوفمبر 2008
طالق بالثلاثة!
من الغباء التسويقي اللي طالعين فيه بعض الشركات هالايام، هو اختيار بعض من الجمل السلبيه، وتحويلها الا سلوقن حق اي بطيخ(حملة) يسونها!
قبل مده خلص الاشتراك مال الجريدة وبعد مدة دقت علي المندوبه
المندوبه:
"ها تحب تجدد الاشتراك؟"
انا:
"ماني مجدد!"
المندوبه:
"اقدر اعرف الاسباب"
انا:
"لأني انا المشترك بالجريده، واخر واحد يقراها! اذا اخواني يبون خل اهما يشتركون!"
صج! حاقه غريبه واللهِ
السؤال الحين
لو كنت شايف هالإعلان قبل لا تكلمني جان صار هذا ردي
انا:
بصراحة انا طلقت الجريده بالثلاثه!
وما اقدر اجدد الا لما اشترك بجريده ثانية اول!
يعني محلل!
انا بس مو زعلان الا على الملاحق!
مو حسافة يتشتتون بدون ابو!
الثلاثاء، 28 أكتوبر 2008
التسعينات وافتكينا منها :)
توني صعدت على الميزان واقدر اقول انه الدسطوور عامل عمايلو
استغربت من الرقم اللي طلع!
ترا صج الرقم مو لاعب بالصوره!
أخيراً انكشف المصطووور وعرفتو وزني
بس بعد ما طيرتلي جم كيلو (;
باقي لي بس عشره كيلو
يالله همتكم وياي D:
مو تضحكون على اصابعي p;
اذا تبون تضحكون صج سمعو البوس كاست اليديد p;
الاشتراك في:
الرسائل (Atom)
المشاركات
