الاثنين، 29 يونيو، 2015

اختبار متابعة!!!

كح كح كح،،، غبار عدل؟!    بعد خمس سنوات انقطاع حبيت اسوي هذا البوست علشان اشوف اذا ليلحين في اي متابع، الدنيا تغيرت وتغير وياها كل شي، ولكن تستمر الحياة

Tوتحيّا

الخميس، 11 مارس، 2010

اكبر علم كويتي!

video

الثلاثاء، 2 مارس، 2010

اهلييييييين!

مرحبا شباب وشابات النت

عجبني هالفيديو وقلت خل احطه لكم تتسلون شوي


وتحيّاT

الأربعاء، 18 نوفمبر، 2009

إءرا الحدسة!


الله يسامح الربع بالدوام وكلوني ككاو وقلت خل اروح احرقه على البحر، ولا هذا الحادث يصير جدامي!
سياره دعمت سيارة بعدين يت السيارة الثانية تنحاش جان تيي سيارة ثالثة وتدعمها وتقطها صوبي،،،، جان ادش فييييها، جان الي وراي يدش فيني، مع ان خففت لما شفت الدعمه الاولى وطقيت بريك قوي بس الى مكتوب لازم يصير.

الحمدلله انا بخير

وتحيّاT

الاثنين، 26 أكتوبر، 2009

طالع داش!


اذا كنت قاعد تقرا هذا البوست معناته انك من محبي فني كويتي، لأنك قدرت توصل للبلوق مع انه عنوان الموقع تغير، لأن ما مداني اجدد اشتراك الدومين الا وواحد ناطرني نطرة، الظاهر عاجبه الاسم الاخ، المهم الحين سويت واحد ثاني بس ضفت داش يعني صار


وان شاء الله بارجع اكتب وبشوف صاحبنا شنو بيسوي بالعنوان!

بس الرك على المضمون :)

اصدقائي المدونين يرجى الاتعاظ والنشر علشان الكل يستفيد وياريت لو تعدلون لنكي بس بإضافة داش الى العنوان

وتحيّاT

السبت، 22 أغسطس، 2009

عيدكم مبارك!





بس احتياط اخاف اغط زياده ولا شي احب اقول لكم مبارك عليكم الشهر، عيدكم مبارك، وهابي نيوييير

عموما ان شاء الله الله يتقبل منكم مشاهدة التلفزيون في هذا الشهر الفضيل، وتختمون لكم جم مسلسل، علشان كل مسلسل تختمونه تتضاعف حسناتكم!

واتمنالكم Good Luck في المحافظة على الوزن، علشان اهدوم العيد ما تنشق وانتوا تلبسونها.

وتحيّاT

السبت، 20 يونيو، 2009

لا باكيت ولا غدا الشر!


علي اساس اني رجعت اكتب واقرا بلوقات، بس الواقع غير هذا، انا ساعات اكون مندمج بشي وانط لشي ثاني، تركيبت مخي جذيه.

قلت لكم قبل على سالفة العملية مالت عيني الي كنت ناطرها من السنه الي طافت، كنت اراجع المستشفى كل اسبوعين ثلاثة واسألهم متى؟! يقولون لي ماكوا قرنيات، انطر، وانطر وانطر، بس اخر مرة قلت لهم وبكل ادب، "زين وين ممكن الواحد يشتكي؟" قالوا لي شوف ادارة ابن سينا، قلت مالي خلق لا لابن سينا ولا لابن رشد ومشيت والشكوى لله.

ثاني يوم سبحان الله دقو علي وقالولي تعال باجر والعملية عقب باجر!!

صراحة ماكنت مصدق وقلت الحمدلله، بس يا ترى هل كلمة الشكوى هي السبب؟!

الحين شيقعدني من النوم الصبح؟! ماكو الا اني اوقت الساعة والتلفون وانوم قوچاني عندي بالغرفة علشان تقعدني الصبح كالعادة، هذي سوالفها.

ومن باجر الصبح لميت قشي ولابتوبي وحوض السمج ورحت المستشفى.

سوولي اوراق الدخول ودشيت، وهذي اول مرة انام فيها بأي مستشفى، اول ما دشيت الغرفة قلت زين خل اكمل نومتي الحين بما اني ماكنت نايم عدل، عاد يخلون الواحد!

ياني السستر الريال خل نسمية البرذر احسن، وسحب مني دم علشان يحللونه، قلت له ليش هو حرام؟!!

المهم اخذ العينة وراح قلت له "هيي هيي تعال، وين العشر دنانير؟.... اووو هذا مو هنييي"

تبون الصج عاد انا عمري ما تبرعت بالدم، انا دمي ڤيمتو وما اعتقد في مريض محتاج فيمتو من نفس فصيلة فيمتووييي p;

بعدها ياني بورتر وقال لي يالله علشان نسوي الاشعة، ييب بطاقتك المدنية وتعال معاي بالكرسي المتحرك بوتواير، قلت الله زين من زمان وانا اشوفة بس ولا مرة جربته، بس ليش الكرسي انا عادي اقدر امشي؟ قال لي هذا قانون المستشفى! يالله قانون قانون وانا شوراي، ركبت وياه ورحنا ونزلنا من الاصنصير وشوي ولا اتذكر بطاقتي ما يبتها، جان اقول له لحظة نسيت البطاقة ورجعت ركض انا ويا البجاما مالتي جني "العيال كبرت" يبت البطاقة ورديت له وكملنا المشوار.

وانا بالطريج وهذا يدزني والناس رايحة رادة يمي، وانا حاط ريل على ريل واقرا الجريدة، واكل حب، ليما وصلنا الاشعة

"وين بتاكة؟" سألني البورتر، عطيته اياها وراح خلص الشغل كله!! قلت والله وناسة، ان شاء الله اذا طلعت من المستشفى بحط لي واحد جذية حقي وبشتريلي نفس الكرسي هذا بس يكون في مساج بالمرة. علشان اذا بسوي اي معاملة بالدولة ما ادوخ (;

خذولوي الاشعة بس حسافة ما كنت ساكب، يالله مو مشكله اهم شي اني عطيتهم الابتسامة الشقاقية :)

والغريب انه الاشعة كانت على صدري مع ان العملية حق عيني، عاد انا شاط عمري وممشط الشعر، بس كله عالفاضي.

وانا بالرجعه قلت انا مو جني "مفيد الوحش" جان اطلع تلفوني واصور هالمشهد


المهم وصلت الغرفة وقلت اخير راح انام، وما مداني اغفي شوية الا وهذا الي ياي، قوم قوم قدا قدا!! وليييييه، يالله قدا قدا!!

عاد يخلونك تتهنى بالقدا! شوية ولا البرذر ياي يقول لي الدكتورة تبي تشوفك، قلت وينها ليش هي ما تيي، هذا خبري انا بالافلام والمسلسلات الدكتور هو الي يروح حق المريض مو العكس. رحت اشوف شالسالفة، ودشيت على الدكتورة بالمكتب انا ويا بيجامتي وقالت لي، "ادري بتذبحني الحين بس اذا دريت شالسالفة راحت تعذرني"

وانا "اييييي!!!"

الدكتورة:"السالفة انه في مريض محروق وفي غيبوبة وجفونه مو قادرين يسكرونهم والقرنية عنده رايحة بعيونه الثنتين ولازم نحط قرنيات ولا راح تروح عيونه وينعمي، وما عندنا الا هالقرنيتين الي وحدة حقك ووحدة حق مريضة ثانية، وان شاء الله الدفعة الياية على طول اندق عليك"

انا" !! !!! !!!!!!! !!!!!"

بصراحة انا مادري اصدق ولا اجذب، بس خليتها على الله

لميت قشي مرة ثانية وطلعت من المستشفى والبقية لاحقاً عاد مادري متى الشهر الياي الي عقبه انتوا وحظكم p;

وتحيّاT

الجمعة، 1 مايو، 2009

باكيت!


باكيت يعني باك يعني رجعت، مو باكيت زقاير!

اشكر كل الي ما اسألوا عني وانا غايب، واقول زين انكم ما سألتوا لأني ماكنت راح ارد عليكم!

صراحتن كنت مشغول وايد وماسك كذا مشروع بوقت واحد ومو فاضي احك راسي!!!

لا مو صج!

الصج اني كنت مفلس والانترنت كان مقطوع والموبايل مقطوع مابقى الا الشسمه تنقطع علشان تكمل!!

الشسمه الي هي الكهربا!

مع انها ساعات تنقطع، قبل جم يوم بس قعدت الصبح على غير عوايدي، وِلّا البيت شي شغال وشي طافي، اقصد الكهربا، اجيك البوكس، الفيوزات اوكي شغاله!

دقيت على طواري الكهربا، والحمدلله بعد ساعتين رجعت الكهربا.

ابيخ شي لما تنقطع الكهربا! خصوصا بالصيف!

هي اذا يت علي انا مو مشكله اطلع مني مني ان شاء الله اقزرها قز بالسيارة، بس حظي انا القطاوة وحوض السمج، يعني مو شي زاخلي اثنعش قطو بالسياره وقاعد اتمشى بشارع الخليج!

ارجع حق سالفة الفلس.

الفلس يؤدي الى السلف لأن سلف عكس كلمة فلس، واثنينهم يؤدون الى بعض، اذا تسلفت بتفلس واذا فلست بتتسلف.

انا اذا فلست ما اتسلف، الا في الشديد القوي، بس الي اسويه هو اني اشوف الي انا مسلفهم اذا لهم نية يرجون لي فلوسي، اقول يالحبيب جنك مصختها، الفلوس الي قاعد تسافر فيها وتلعب فيها ترا فلوسي، اذا ما عندك مانع يعني، رجعهم!

الفلس حاله ممكان تصيب اي شخص مهما كان غني، الفرق انه الغني يشهر افلاسه، بس الفقير الناس تدري انه حافي مفلس! انا الحين قاعد اشهر افلاسي بالنت. والي يقرا البلوق ويعرفني شخصيا يعرف ليش انا مفلس.

الدنيا دواره ويوم مفلس ويوم مادري شسوي بالفلوس!

الفايدة الوحيدة من الفلس انك تعرف منو الزين ومنو الشين من الناس الي تعرفهم.

في ناس ناطرين الواحد يطيح علشان يكتون العيش فوقة ويسوونه قوزي ادمي ويعزمون ربعهم! وفي ناس تشيلك.

المهم بس علشان تنفرج العقدة مالت الكتابة. "ومن شر حاسد اذا حسد" راح انشر البوست الي صارلي شهر وانا كاتبه وماني عارف اخلصه بسبت عين واحد يعرف نفسه عدل! فمشو حالكم بهالبوست وترقبوا بوستي الياي عن دخولي المستشفى!!!

وتحيّاT

السبت، 21 فبراير، 2009

الي ما يشتري يتفرق - بنك بَنَك!


كان ودي اعرف رايكم في بعض من سوالفي الي بالبوس كاست، لأنه اعتقد انه في ناس ما سمعوا ووعوا p;

فقررت انه اقتطف مقاطع من البوس كاست واكتبها واشوف رايكم

وهذا مقطع ان شاء الله يعجبكم

دعاية

بنك بَنَك

الآن افتح مع بنك بَنَك حساب العنجكك

مع حساب العنجكك ستكون مؤهل للفوز بخيشة عنجكك

وبهذا تكون مليونير العنجكك

لأن هذا الخيشة تحتوي على مليوووووون عنجككه!

©©©

بنك بَنَك

تم تطوير بنك بَنَك ليتوافق مع احكام الشريعة الاسلامية!

الآن اذا اردت قرضا كل ما عليك عمله هو اخذ كيسين بَنَك وتبيعم بأي دوار

على ان ترجعهم ثلاثة اكياااااس!

بنك بَنَك ،،، البنك علينا ودكتور الأسنان عليك!

وتحيّاT

الثلاثاء، 17 فبراير، 2009

قطاوت Funny!

CATBasket3

الشهر الي طاف حطيت اعلان بمركز سلطان حق قطاوة، وعادةً اكون طابع الاعلان عند المصور، بس هالمرة كنت بمكتب واحد من الربع وقلت خل اطبع الاعلان عنده.

كنت منزل اعلان بعرب نوكيا وكانت فيه هالصورة، فدشيت على السايت وطبعت الصورة وكتبت عليها بالقلم للبيع قطاوة ورقم التلفون.

الامر اليديد هو انه الصورة كان مكتوب عليها Funny Q8i!

اوكي وايد حطيت اعلانات قبل بس هالاعلان صج انشخلت اتصالات وبصراحة عمره ما احد دق علي على اعلان كثر هالمرة! عاد ياريت شرّايه! بس يسألون!Tongue

وانا ما يذبحني الا الي يقولي دز عنوانك مسج وهذا ويه الضيف! At wits end

لا ويسألون اسئله غريبه مثل “شنو اسمك؟ انت متزوج؟ بيحلون المجلس ولا لأ؟!!!” Time out

بذمتكم منو شاف الاعلان وقال اوه هذا Funny Q8i!!! خل ادق استعبط عليه شوي ؟Rolling on the floor

catpana

الأحد، 15 فبراير، 2009

شقلبات!

امس كنت امشي بممشى المرينا فشفت الشباب قاعد يتشقلبون، الظاهر هذي اخر الهبات الحين، الله يخلي اليوتيوب وما اييب!

والله كان ودي اتشقلب وياهم بس ماتسوى على اكسر لي شي في هالليله المفترجه p:

وفي ناس البارحة تشقلبوا تشقلب من نوع آخر p;

ها تشقلبتوا ولا بعد؟

الخميس، 12 فبراير، 2009

غبار يونس!

ghbar 1

ساعات الانسان يكبر الامور على تفاهات، مثلا قبل مدة الدرج مال السيارة فلت وانا اسكرة واشوف انه في شي انكسر وما قدرت ارجعه مكانه!

ظل الدرج مقطوط بالسيارة حول الشهرين! بس لأني مالي خلق اروح الشويخ، ويتراوالي انها سافه تطول وحوسه وتكلف مليون دينار!

طلعت امس بالغبار وكانت الرؤية ضعفية يعني بعد المية متر ما تشوف شي!

كان مزاجي عالي، وابي اتمشى، قلت بتمشى والي فيها فيها!

ghbar 4

مريت يم الغانم مال قطع الغيار، قلت زين على دربي اشوف سافة الدرج.

ghbar 3

طليت على الدرج وشغلت الجمجمة ولا القطعة المكسور عباره  عن كلبسه صغيره!

سألت عنها وما راح تصدقون بجم طلعت!

  ghbar 5  

اربعمية فلس الوحده، يعني الثنتين بثمنمية فلس!

ghbar 2

خذيتهم وركبتهم عالسريع ورجع الدرج مكانه بعد طول غياب!

زين الدرج وحصلناله كلبسات، بس قلبي لي انشلع من وين ايب له كلبسااااات؟!!

الأربعاء، 11 فبراير، 2009

عبير!


جلست وحيدا


بين دموع الشموع


اتأمل بأفكارٍ


تزهو بلون عبيرك


نعم!


عبيرك له لون


خيالك


له نور


نور متلئليء


يزهو بالجمال


الجمال يشكو منك


كيف تسرقين هذا الاسم


لتحوليه الى عبير!

الاثنين، 9 فبراير، 2009

اضحك ولا ابجي!

اذا مزاجك عالي شوف الاغنية



واذا تبي تضحك شوف نفس الاغنية باسلوب ثاني


كلمة وحدة!


ضحكت والدمعة في عيني


والغصة في جوفي


والحسرة في قلبي


بس يا ترا تحس؟


خلني اشكيك لنفسي


يمكن تعافك وارتاح


او اصحى واكتشف انك حلم


حلم ماله وصف


الا كلمه وحده


أحبك