هل تعلم ان العقل.........؟
هل تعلم ان القلب.........؟
هل تعلم انك................؟
فلم الخجل؟
قلها بصوت خافت
او ان شئت بصوت عال
واسمعهم
من أنا
ومن أنت
انا من تعلم
وانت من لا اعلم
انا الماضي
وانت المستقبل
فكيف لنا ان نلتقي
وبيننا الحاضر
أعلم انك عني بعيد
وقد تكون منشغلا بغيري
ولكن
إعلم اني منشغل بك
فلا تنسى من انت
ومن انا
وما حصل بيننا
كل منا سائر في خطاه
وتذكر
انك انت من غاب
وحيث ما تكون
فالموت سيجمعنا!
احلامي تبدأ حيث انتهى الأخرون
البساطه
الراحة النفسية هي كل ما انشد
ما الثمن؟
اطمع بحب خالد
احلم بقلب صادق
اصبوا الى يد حنونة
ولكني
لم اجد شيئا
هل اخطأت في المكان
هل تعثرت في الزمان
هل صوتي لا يسمع
ماذا افعل كي تعلم ان المسؤول هو أنت
كبحت نفسي عن مناداتك
والتزمت الصمت
حيث اني لم اعد قادرا على مواصلة المسير
فآثارك بدأت بالخفوت
والسراب غطى عليك
بل انك انت السراب بعينه
لماذا سمحت لنفسي بملاحقة السراب
وانا اعلم!
ولكنه العطش!
لم ارتوي!
ولكني ازددت عطشا
وسأزيد من عطشي
حتى يأتي يوم ارتوي فيه
بما هو حقيقي
بعيدا عن الخيالات
وسأمر بجانبك وابتسم بحزن!
وستتمنى لو لم تكن سرابا
وستتمنى لو كنت انت الماء الذي اشرب منه
ولكني سأكون قد ارتويت قبل ان اراك!
بعض الناس ما يحسون على دمهم!
بعض الناس ما عندهم احساس!
بعض الناس ما عنهم دم!
بعض الناس حزرة!
بعض الناس انانيين!
بعض الناس ودك ينفذون فيهم حكم الاعدام بساحة العلم!
بعض الناس ياكلون ويمشون ايدهم بالطوفة!
بعض الناس ودك تقول لهم روحوا موتوا!
والبعض الآخر من الناس
تحطه على الجرح يبرا
بعض الناس ودك بس تسمعهم يتكلمون بالساعات وانت تسمع وتستمتع
بعض الناس ودك بس تشوفهم حتى لو ساكتين هم تستمتع
بعض الناس ودك تعيش العمر كله وياهم، واذا مت ودك بالجنه تشاركهم
وليش؟
بعض الناس ما يدرون عن هوا دارك
وبعض الناس اذا رحت يمين راحوا يسار
وبعض الناس اذا قلت لهم احمر قالوا لأ أصفر
الناس عبارة خليط من بعض الناس
ليش؟
بعض الناس يستمتعون بتعليق الآخرين؟!
ويجربون فيهم!
مع انه من الأولى لهم انهم يجربون على الحيوانات اللي مثلهم!
وماتدري ولا هم يدرون ليش يسوون جذيه!
بس عايشين يشربكون ويكروتون!
بس لازم الانسان يتعض من هالحياة
لأنه لازم يمر على بعض من هذا وبعض من ذاك
بس للأسف مافي ليبل يقول لك مع أي البعض انت قاعد تتعامل!
حست وراحت عيوني وليلحين ماني عارف شلون زادوا واحد!!!
جنهم وزراء، وفي وزير محيرهم ومو عارفين يشيلونه ولا يخلونه!
رحت المعرض وكالعادة ماكو شي يديد، بس مع ذلك لازم اروح اشوف! وكأنه واجب قومي! كل سنه يشيلون حولي ويحطونها بالمعرض، بس هالسنة المشاركة حدها قليلة، والغالبيه لشركات التلفونات والوزارات والهيئات! تقول داش مجمع الوزارات!
قبل مدة قوچاني ولدت، وكلموني وايد ناس يبون يشترون بس اقول لهم نطروا لما يكبرون شوي، يعني انا عادةً ابيع بعد عمر اربع خمس اسابيع، لما يبتدون ياكلون ويركضون، بس جلب فيني صديق الا تبيعني وحدة الحين، مع اني قلت له انها ليلحين ترضع وحيل صغيرة، فقال لي عادي اللي بياخذونها يعرفون يتصرفون وياها!
سلمت أمري لله وبعته القطوة، بس اييكم العلم، قوچاني كانت والدة اربع، والحين نقصو وحدة، والمسكينة هالمرة شاده حيلها وياهم وقاعدة ترضعم تمام ومجابلتهم عدل، يعني صايرة ربت بيت درجة اولى، مع انه اخر مرة ولدت يابت اربعه، مات منهم ثلاث والرابع قطيته عند خالتها حبيبة ترضعه، بس هالمرة صايرة مرا.
الحين تعال حل المشكلة:
قوجاني:"واحد، اتنين، تلاتة، !!!!!!! فين الرابعه فيييين بنتي الرابعة؟ ضنايا، قيبووولي ضنايا"
مادي شلون ومن وين يالها الاستنتاج انه "هيزل" اكلت او باقت بنتها! لا تستغربون، الحالتين صاروا عندي! مرة "ايديدا" كلت بنتها اللي عمرها اسبوع! وساعات كانت تبوق عيال بناتها وتحطهم ويا عيالها جنه ماكو شي صاير
ايديدا:"لا عادي عادي علشان اخاويهم من الرضاع!"
قوچاني شاكة بـ"هيزل" اللي تصير خالتها ومرت ابوها وبنفس الوقت شريجتها! ومن ذاك اليوم اللي بعت فيه القطوة واهي صايرة شرية وما تتحاجى!
أنا:"يا بنت الحلال! طولي بالج"
قوچاني: "ماريد ماريد الا اكسر ذيلها بنت البزونه!"
أنا: "الحين انتي مو مساع تتحجين مصري؟! شاللي قلبج عراقي؟ شنو مسوية بساط الفقر؟!"
قوچاني: "چب زين، انت بس تتصيد!"
طبعا انا ما قلتلها اني بعت بنتها! خليتها على عماها وصارت بويه "هيزل"!
بس شكلي انا اللي باكلها من الهوشات كل يوم، تقول شرايج!
بس صح هم شرايج من قبل! بس الحين صار بينهم طار، اقصد ثار!
طافكم في ليلة راس السنة، خووووش مشهد، حده متأخر البوست أدري
كنت بسوق شرق، وانا ماروح سوق شرق الا اذا بروح مركز سلطان،لأنه الافينيوز قضى عليه!
حست شوية بالمركز، وكالعادة عصبت، لأني دايما احوس على ما اعرف اي شي جم سعرة!
إلا المخ حاطين عليه سعر!
وهذا بعد حاطين عليه سعر، لأنه محد راح يسأل ويقول "بجم بيض الخروف؟"!!!
بعدها قلت خل اطق لي فرة بالسوق، وكنت قاعد اسولف مع صديق عالتلفون، بما انه كان اخر يوم بالشهر وبخلص الباجي من الرصيد مال الباكج قبل لا يروح علي 
علشان ما يكون هذا مصيري، طلعت من مركز سلطان ومريت GNC فوق وقعدت اطالع الحبوب، اشوف لي شي يساعد الرجيم، اكتشفت بالصدفة منتج اسمه ليبو ٦ سعرة ١٥ دينار، مع اني قبل يومين كنت بالسيتي سنتر وريال شراه جدامي ب٢٥ فأشوه انه مو انا جان مت قهر، وحسافه انه مو رفيجي ولا چان دقيت عليه وضحكت ضحك اليهد!
ويمكن لو ما كان اخر حبة جان خذيتلي واحد!
عاد فكرت اني اشتريه، بس بما انه فيه كمية منه، قلت خل اجيك عليه بالانترنت اول، انا من النوع اللي يحب يجيك كل شي بالنت، السعر، المواصفات، راي الناس، وشنو امكانية اني احصلة بسعر ارخص، وهذي اهم نقطة
لأنه محد فينا عنده استعداد يدفع اكثر في أي شي الا اذا فيه ميزه شكبرها، او انه ماله خلق ينطر، او يخاف من النچلات!
عادي انا احب المخاطرة، قبل مده كنت طالب حبوب من امازون، وحست على ما طلعتهم من الجمارك ووزارة الصحة، بس بالنهاية كانوا ثلث سعرهم بالكويت!
بس حسافة بعضهم كان تاريخ الانتهاء ماله قريب!
لقيت هاللصقة، الواحد يلصقها ويضعف!
شهاللصقة الي ب22 دينار!
تيب ب150 فلس من البقالة واتييب فيها حلجي وبطني وبالمرة بوكي علشان ما اطلب من المطعم!
نرجع مره ثانية وين كنت؟
اي، قلت بعدين اشوفه، وطلعت من المحل لأنه ياني تلفون وكنت اسولف واتمشى، اذكر قبل كنت آكل وانا أتمشى، غريبه من زمان ما سويتها، شورما وسفن وانا قاعد اتمشى!
وانا قاعد اتمشى في ممرات سوق شرق، مريت بين هوشه! كل اللي اذكرة شي مثل "احترم نفسك احسلّك،،،، يالله انقلعي انقلعي"!
كانت وحده قاعده تزف اثنين، والاثنين هذيلا كانو لابسين مثل مثل! الحمدلله والشكر، شنو الأخوة فرقة؟!
المهم طفتهم وجدام شوية ولا في امن بو لاسلكي، قلت له في هوشه ورا وأشرت له ومشيت ، وبعد شويا ولا هذيلا يركضون يمي ويا قمصانهم المخططة ابيض واسود اللي جنهم من مساجين امريكا، بس ناقصهم السلسلة ام كرة حديدية!
سويت لفه بالسوق، بعدين قلت خل ارجع مركز سلطان اخذ لي جم شغلة، والساعة كانت ٩ ليلة راس السنة والبيبان تسكرت! شالسالفة؟ مادري!
الحين صارت السالفة، على ما لقيت لي باب اطلع منه من سوق شرق وكنت متوجه حق مركز سلطان، شفت من بعيد لوية عند الباب، وايد شباب، وأمن!
استوعبت انهم ما يدششون الا عايلات، اوتوماتيكيا وانا قاعد امشي كان في يمي وحدة منقبة وامها الحجية، جك بك مشيت بينهم والتوقيت كان عجيييب، يعني بالضبط صارت هذي مرتي وهذي عمتي!
عاد كنت ساكب حزتها
بس محد سألني، الظاهر اني كنت جايد الدور، كل هذا وانا قاعد اتكلم بالتلفون
المهم انا دشيت منيه و ورررررر، لي داخل بسرعه بسرعه، زين ما جكوني، بس صراحة ضميري انبني وايد، فقررت اني اصلح غلطتي،
فتزوجت المرا!!! اي خطبتها من الكاشير، والمهر كان بالكي نت! وبالمرة حصلت 5000 نقطة ببطاقة الريوردز!
المشاركات
جميع التعليقات
