الجمعة، 3 أكتوبر 2008
الأربعاء، 1 أكتوبر 2008
جالاكسي! صج مو غشمرة!
تقدر الككاو؟
تحب الجالاكسي؟
تبي تاكل جالاكسي
وتدعي لي؟
اتبع هذي الطريقه:
وانت رايح الدوام مر بقالة حجي رمَضان، واخذ منه واحد جالاكسي، او اكثر اذا حبيت!
وهده بالسيارة بالشمس ليما يموووع!
واذا رجعت البيت اخذ الجالاكسي وهو مايع، وفقص الچيس شوي مو وايد علشان يختلط الككاو داخله!
وبعدين حطه بالفريزر، مو الثلاجة! الفريييزر.
وعادي لو تخليه لي باچر مو مشكله، ما راح يثلج، بس راح يتماسك ويصير شي عجييييييب!
لازم تذوق علشان تقدر!
وجرب وقولي رايك ;)
الثلاثاء، 30 سبتمبر 2008
موبايلي اليديد حده لذيييييذ!
بعد ما مليت من الأي فون!
ولاعت چبدي من الأي ميت!
لأنهم طلعوا ،،، "أي كلام!"
فشفت انه ما فيها "أي شي!" اني اخذ هذا التلفون!
الي سميته
"أي سكريم iSCREAM"
حده لذيذ وخصوصا الدقم!
وسعره بس 100 فلس وفيه رصيد 100 فلس علشان تدزلك چم مسج بالمرة وانت قاعد تاكله!
،،، شين تشكر إتّشالك!
سيد الأدلة!
كم كيلو زاد وزنك بعد نهاية هالشهر؟
اعترف!
الميزان اشتكى ويقول:
حرام اللي قاعد تسويه فيني!
ابوس ايدك ارحمني!
ادعي ربي كل يوم انك تضعف ويصير وزنك مثالي،
علشان افتك من الدوس كل يوم!
انا زدت ٤ كيلو...
قول ولا تستحي! لا تقول لي وزنك، بس قول لي اذا زاد او نقص؟
وكل عام وانتم بخير
الاثنين، 29 سبتمبر 2008
يبيله طق! 2
اليوم رحت حق "بنك يبيله!" علشان الرقم السري! بس ليلحين ما اشتغل السيستم مالهم!
يعني من يوم الاربعاء لي يوم الاثنين وماانحلت المشكلة!
يا ترى شنو بعد يبيله؟!
الأحد، 28 سبتمبر 2008
يا ترى وينچ؟!!
ليش اللحظات السعيدة تمر بسرعة، واذا ناديناها ما ترد علينا وتكمل في طريجها
ليش الاكلة الحلوة طعمها ما يضل في حلج البني ادم
ليش العيد مو مثل اول
لييييش محد يعطيييني عيدية !!!
تذكرون اخر مرة حصلتوا عيدية؟ ما اقصد الحريم؟
لأن العيدية بالنسبة لهم مستمرة وما تتوقف مع زيادة العمر!
مادري! يمكنهم دافعين اشتراكات حق التأمينات!
احنا يالشباب، الي صرفنا عيادينا على الخرابيط!
تذكرون قبل "نحن والاطفال" لوووول
تقول الواحد چنه اول مرة يطلب من أمازون ، اششششخط بالڤيزا لووووول
ايام وراحت! وما راح ترجع!
عيديتي! يا ترى وينچ؟!...
مستوحى من موضوع 7anna7inno
السبت، 27 سبتمبر 2008
برّييد!
هذا البرد صج يبرد چبدك!
يعني راهي مو مثل برد "كنت اكاكي" اللي فاضي من داخل وبس شويه من فوق!
اللي يبيه يلاقيه بمحل العصير بجمعية العديلية
اليوم فصلت وقلت باكل اثنين سوا يعني ثري** P:
اليوم فصلت وقلت باكل اثنين سوا يعني ثري** P:
واخر مرة ادز بوست من الأيفون والعربي الدايخ ماله لووووول
الخميس، 25 سبتمبر 2008
يبيله طق!
قبل مدة كنت في"دعم العبالة!" وكان بنك يبيله موجود، فالريال فتح لي حساب، بس اخذ صورة البطاقة المدنية عالسريع.
رحت استلم البطاقة طلع السبلنج ما الاسم غلط، لأن الاخ الموظف ما سألني وهو عباه على كيفه! فقلت لهم يسوون لي كرت ثاني!
رحت امس استلم الكرت، واستلمته بس ماكو رقم سري! لأنه الجهاز خربان! الموظفة قالتلي مر باچر!
رحت اليوم ولا ليلحين موشغال، قالت لي جرب فرع ثاني! رحت فرع ثاني! قال لي "السيستم كله موشغال! ماكوا الا يوم الاحد"!!
يا جماعة دلوني! في بنك مضبوط؟!!
ماكو "لوووول" اليوم! لوووووول
يفتح الله!
رحت اليوم اسكر حسابي من بيت التوريط! طبعاً زحمة كالعادة ومافي الا ٢ عالكاونتر ومليون عميل!
انا كنت ناوي اسكر الحساب، بعد لوعة الچبد الي سووها لي!!
وبعد ما وصل دوري، الموظف قال لي ان لازم يطلعوون براءة ذمة أول، بعدين تقدر تسكر الحساب! والسالفة يبيلها ٣ ايام عمل يعني راحت لي ورا العيد!!
استانست وايد لأني لقيت سالفة يديدة حق البلوق! ولا عادةً اكون معصب، والله البلوق هذا عجييييب، يعني فشششش خلأك!
الأحد، 21 سبتمبر 2008
زواج المبلاق! او زواج المدوان!
يا ترى اذا كان في مثل هالزواج، چان شصار؟؟
يعني واحد ووحدة يشتركون ببلوق واحد، علشان تساعده بالبلوق، وتكتب له مقالاته وتسنع له التمبلت والجافا سكربت، وهو يرد على التعليقات الحلوة! ويدور مواضيع يديدة! ويمكن الله يرزقهم ببلوق ثاني صغيّر يفرحون فيه! ولا شرايكم؟!
هالايام دايرة سالفة الي يقول شوفولي عروس، وشرط تكون تشتغل، ومدرّسة بعد! احد يقول لي ليش مدرّسة بالذات؟!
الله يرحم زمان اول، يوم ما كانوا يشرطون انها ما تشتغل!!
الزمن قاعد يتغير! يا ترى بعدين شنو بيشرطون؟
تخيل الخاطب يقول:
"تدفيعين لي اقصاد سيارتي، ومصاريف اليهال عليچ، والاجار بالنص، واذا سيارتي خربت تصلحينها! وماچلة البيت وزقايري ومعاش الخدامة! ولا انا شحقه ماخذ وحدة تشتغل؟!!"
المخطوبة:
"ماتبي اسد لك القرض مال المهر بعد؟!!"
السبت، 20 سبتمبر 2008
زين! وبعدين؟!!
"هيّن، أراويك، يصير خير" كلها اسامي شركات اتصالات يديدة راح تفتح، السؤال بمنو راح تكتتب؟!
شي زين! يصير في وايد شركات اتصالات علشان كل ما تعصب من شركة تروح حق الثانية، ليما ترد تلف من الاول وهلمه جرّه!
بس رقمك شلون؟
بامريكيا "والدول المتقدمة" رقمك تقدر تنقلة من شركة لي شركة عادي، منت مربوط بهيين ولا هيين!
اذا صار رقمك ملعوز بعد الزيادة، فابشرك انه بتطلع ارقام وايد يديدة، ذهبية وماسية، وزمردجية بعد! وباسعار معقولة، ففرصتك الحين اذا بتغير رقمك!
الجمعة، 19 سبتمبر 2008
ماك وفايدة أبل!!
اذا كنت تستخدم الماك راح تفهم قصدي، انا احب الماك، ومع ذلك استخدم الماك والويندوز بنفس الوقت! يقولون راعي البالين چذاب. يا ترى چم بال عندك؟
اذا كنت تستخدم البي سي ، ومتحسف تشتريلك ماك، وماتبي تدش بلوية الهاك، تقدر تشتري هذي القطعة وتحطها داخل كمبيوترك (الدسك توب) وبالهندي (دكس توب) لوووول
المهم القطعة تخليك تقدر تركب سيستم الماك الاصلي بدون هاك ولا عطني لووووول مليييييق!
القطعة من تايوان تكلف 125$ يعني اذا شفتها بالكويت، بتنباع حروة الستين دينار، وموتوا قهر يا ابل لووووول
عاد انا ريال ماكي بس ساعات ابل يحرونك! ومايبردون الچبد، يعني لازم التكنلوجيا ينزلونها بالقطارة!
سوو حسابكم، ما راح تطول السالفة قبل لا تبتدي تشوف سوالف مثل ديل او توشيبا وعليه ماك او اس الاصلي، وبعدها بمدة يالله يصير الماك او اس ينباع للكل!
والله اعلم
ريحة؟! لها صوت!!
الريحة قاعدة تسبب لي مشاكل بالبيت، حبيت اني اناقش الموضوع مع اسرتي،، فلميت القطاوه ويبت البغبغاء وقعدنا عند حوض السمج وصار بينا هالحديث
البغبغاء: انا مالي شغل، كله من القطاوه
القطاوة: معروف منو سبب الزفرة! طبعاً السمج
السمچة:بق بق بق
انا: عندچ دليل على هالكلام
السمچة: بق، بق بق بق بق
انا: مدام السالفة چذية لازم اكنسل اشتراك طواليتي نت، علشان افتك من الريحة الخايسة
البغبغاء: انا مالي شغل، كله من القطاوه
القطاوة: معروف منو سبب الزفرة! طبعاً السمج
السمچة:بق بق بق
انا: عندچ دليل على هالكلام
السمچة: بق، بق بق بق بق
انا: مدام السالفة چذية لازم اكنسل اشتراك طواليتي نت، علشان افتك من الريحة الخايسة
***
على طاري ريحة خايسة
طق على اسم البوست "ريحة؟!" وشم!! قصدي شووف! اهل باريس ما خلو شي!!
الاثنين، 15 سبتمبر 2008
حوضي وملاقت سمچ!
هذي صورة حق حوضي، فيه سمچ وياقوت ومرجان! أحمدك يا رب! لوووول
السؤال هو شنو شعور هذي المخلوقات وهيا محطوطة بحوض مثل هذا! وكأنهم قاعدين يمثلون بمسرحية !
عاد السمج كله ضغاط، طا ذيلچ ،چنة مساحة سيارة!!! لاااا من شاف زعنفتچ چنها مخمة حارس! ملاقت سمچ!
كاميرتي حمّضت!
تصور! انه صارلي ثلاث سنين من خذيت النايكون وصوري ليلحين عالهارد ديسك، المشكلة مليون هارد ديسك عندي، يعني "شيلمهن شيلمهن!"
صوري "حمّضوا" وهما على الهارد ديسك يعني صار ما يبيلهم تحميض!
أخيرا صار في معنى من تصويري العشوائي!
مع اني احب التصوير، الا اني تعبت من شيلة جنطة الكاميرا الي متروسة عدسات وفلاشات واكسيسوريز زايدة، بصراحة چتوفي راحوا!
المهم انا ناطر نايكون المحترمين يطلعون كاميرا سنعة ماتفشل مثل ال D3 التعبانة!! ثلاث سنين ناطر شنو؟ 12 ميجا بيكسل، والله فشلة!
الاشتراك في:
الرسائل (Atom)
المشاركات
