السبت، 20 يونيو 2009

لا باكيت ولا غدا الشر!


علي اساس اني رجعت اكتب واقرا بلوقات، بس الواقع غير هذا، انا ساعات اكون مندمج بشي وانط لشي ثاني، تركيبت مخي جذيه.

قلت لكم قبل على سالفة العملية مالت عيني الي كنت ناطرها من السنه الي طافت، كنت اراجع المستشفى كل اسبوعين ثلاثة واسألهم متى؟! يقولون لي ماكوا قرنيات، انطر، وانطر وانطر، بس اخر مرة قلت لهم وبكل ادب، "زين وين ممكن الواحد يشتكي؟" قالوا لي شوف ادارة ابن سينا، قلت مالي خلق لا لابن سينا ولا لابن رشد ومشيت والشكوى لله.

ثاني يوم سبحان الله دقو علي وقالولي تعال باجر والعملية عقب باجر!!

صراحة ماكنت مصدق وقلت الحمدلله، بس يا ترى هل كلمة الشكوى هي السبب؟!

الحين شيقعدني من النوم الصبح؟! ماكو الا اني اوقت الساعة والتلفون وانوم قوچاني عندي بالغرفة علشان تقعدني الصبح كالعادة، هذي سوالفها.

ومن باجر الصبح لميت قشي ولابتوبي وحوض السمج ورحت المستشفى.

سوولي اوراق الدخول ودشيت، وهذي اول مرة انام فيها بأي مستشفى، اول ما دشيت الغرفة قلت زين خل اكمل نومتي الحين بما اني ماكنت نايم عدل، عاد يخلون الواحد!

ياني السستر الريال خل نسمية البرذر احسن، وسحب مني دم علشان يحللونه، قلت له ليش هو حرام؟!!

المهم اخذ العينة وراح قلت له "هيي هيي تعال، وين العشر دنانير؟.... اووو هذا مو هنييي"

تبون الصج عاد انا عمري ما تبرعت بالدم، انا دمي ڤيمتو وما اعتقد في مريض محتاج فيمتو من نفس فصيلة فيمتووييي p;

بعدها ياني بورتر وقال لي يالله علشان نسوي الاشعة، ييب بطاقتك المدنية وتعال معاي بالكرسي المتحرك بوتواير، قلت الله زين من زمان وانا اشوفة بس ولا مرة جربته، بس ليش الكرسي انا عادي اقدر امشي؟ قال لي هذا قانون المستشفى! يالله قانون قانون وانا شوراي، ركبت وياه ورحنا ونزلنا من الاصنصير وشوي ولا اتذكر بطاقتي ما يبتها، جان اقول له لحظة نسيت البطاقة ورجعت ركض انا ويا البجاما مالتي جني "العيال كبرت" يبت البطاقة ورديت له وكملنا المشوار.

وانا بالطريج وهذا يدزني والناس رايحة رادة يمي، وانا حاط ريل على ريل واقرا الجريدة، واكل حب، ليما وصلنا الاشعة

"وين بتاكة؟" سألني البورتر، عطيته اياها وراح خلص الشغل كله!! قلت والله وناسة، ان شاء الله اذا طلعت من المستشفى بحط لي واحد جذية حقي وبشتريلي نفس الكرسي هذا بس يكون في مساج بالمرة. علشان اذا بسوي اي معاملة بالدولة ما ادوخ (;

خذولوي الاشعة بس حسافة ما كنت ساكب، يالله مو مشكله اهم شي اني عطيتهم الابتسامة الشقاقية :)

والغريب انه الاشعة كانت على صدري مع ان العملية حق عيني، عاد انا شاط عمري وممشط الشعر، بس كله عالفاضي.

وانا بالرجعه قلت انا مو جني "مفيد الوحش" جان اطلع تلفوني واصور هالمشهد


المهم وصلت الغرفة وقلت اخير راح انام، وما مداني اغفي شوية الا وهذا الي ياي، قوم قوم قدا قدا!! وليييييه، يالله قدا قدا!!

عاد يخلونك تتهنى بالقدا! شوية ولا البرذر ياي يقول لي الدكتورة تبي تشوفك، قلت وينها ليش هي ما تيي، هذا خبري انا بالافلام والمسلسلات الدكتور هو الي يروح حق المريض مو العكس. رحت اشوف شالسالفة، ودشيت على الدكتورة بالمكتب انا ويا بيجامتي وقالت لي، "ادري بتذبحني الحين بس اذا دريت شالسالفة راحت تعذرني"

وانا "اييييي!!!"

الدكتورة:"السالفة انه في مريض محروق وفي غيبوبة وجفونه مو قادرين يسكرونهم والقرنية عنده رايحة بعيونه الثنتين ولازم نحط قرنيات ولا راح تروح عيونه وينعمي، وما عندنا الا هالقرنيتين الي وحدة حقك ووحدة حق مريضة ثانية، وان شاء الله الدفعة الياية على طول اندق عليك"

انا" !! !!! !!!!!!! !!!!!"

بصراحة انا مادري اصدق ولا اجذب، بس خليتها على الله

لميت قشي مرة ثانية وطلعت من المستشفى والبقية لاحقاً عاد مادري متى الشهر الياي الي عقبه انتوا وحظكم p;

وتحيّاT

هناك 9 تعليقات:

3bady يقول...

بيييييه ما اتشوف شر

يا معود شدراك يمكن خيره حقك القرنية الي بعدها احسن من هذي :)

غير معرف يقول...

المباركيه
"مومسوي تسجيل دخول لأنه النت بطيء"

ماااتشوف شر
الله يعينك ياامعود
ترى مستشفايت الكويت يدخلون الواحد فيه نشله ويطلعونه ..... لا اله الا الله

انا مع عبادي بهالنقطة

موفق

ReLaaaX يقول...

يالله خيره !
وماتدري يمكن الطبيب الشاطر مسافر ولو مسويها الحين جان تخسبقت !


والحمدلله على السلامة

حَافِـيَةُ الَقَدمَيّـنْ ولِبَاسِي المَطـرْ يقول...

يالله الحمدلله على كل حال
ميخالف المريض كان أولى منك بهالقرنيه
تلقاه ينعمي إذا ما ركبوله إياها
بس الحمدلله إنت مافيك شي
جنك البخت p;
خيره مثل ما قالوا

enter-q8 يقول...

لا ان شاء الله بيغدي شرك

ترى انت ولا شي انا الوالد قبل سنتين نفس الحاله
لما سواها بره

ss يقول...

2mby 7ada 7ada 3ajiiiib w ma a3te8eed ena fee shabab tafkirhom man6e8ii chethy nice ya3nii el denya feeha 5iir ya riit lo ent o5oi!!! go on it

Eman يقول...

اجرك على الله وسلامتك ماتشوف شر


والفيديو حده ضحكني لووووووول
جنك كنت متوهق في بعض المشاهد p:

غير معرف يقول...

أين أنت ياا رجل؟

إن شاء الله تكون بخير وترجع بسرعه

maynonah oO yannah يقول...

ويع مليقيين

يالله خير خير

كل تأخيره فيها خيره :d

وماتشووف شر

والفيديوو لووووووووووووووووول عجيب

اهم شي تلف التلفون

عشان انشوووف

إرسال تعليق

تعليقك يهمني، بس تكفه لا تكسر مياديفي :)