الأحد، 19 أكتوبر 2008

مررت فأعجبتني المدونة!!


بعد ما رجعت من صلاة الفجر (حجي فني)
((عاد ليلحين ما حجيت))
قلت خل اطل على التعليقات، چان اشوف تعليق عجبني وايد، من "مركز خدمة المدونين العرب" الي ما مر على من قبل، وتقول الرسالة انه مدونتي اعجبتهم!

استانست وايد، وقلت زين أخيرا راح "أئب على وش الدونيا"

بعدين اشوف باجي التعليقات اللي انا  مشترك فيها ولا نفس المسج "مررت فأعجبتني المدونة" يمين يسار فوق تحت، يااا شالسالفة، ركزت بالرساله بعدين استوعبت انها مجرد اعلان، ولو انها كانت مجرد تعليق لكان تأثيره اكبر.

يعني يا أخت منى كنت اتمنى ان المدونين اللي يتعبون ببوستاتهم ياخذون منج اهتمام اكبر، ولو تقريين مقاله وحدة، ومو ضروري تعلقين عليها، ولكن لو لم تكن الرساله اعلانيه لكان لها وقع اكبر على المدون.

شفيني قاعد اخلط كويتي بلغه عربيه، مادري فيني النوم الظاهر!

بس ابي اعرف اذا المدونه تلوع الچبد شلون؟!!
هل ممكن ترسل رسالة تقول "مررت فلاعت چبدي من المدونة! وانا اقول لو اتصكها احسن لك، ويفضل انك تمسحها بعد!!!"   D:

انا عادي وماني زعلان، كنت اتمنى اني اكون صداقة بطريقة غير تقليدية، يعني انا لو ابي أنشر مديونتي عن طريق اني ادز نكته ما لها اي علاقة ببوست المدون الآخر تهقون أحد بيدش مديونتي؟!!

تخيل تجيك التعليق تلاقي واحد كاتب "مرة واحد طلع عالمعاش معرفش ينزل، طن طرارارم طن طن!!"
شنو بتقول يا تري؟!

بس خل اروح انام الحين، انا متأكد اذا قعدت الصبح بقول مو انا اللي كاتب البوست هذا، اقصد البوسه هذي
موووه

هناك 13 تعليقًا:

صبا يقول...

احب اكون اول الحضور

:))

سأعود

صباحك سكر
:))))

enter-q8 يقول...

تكفى اقرى البروفايل
تقول 1300 واحد
يوبا عاجل مدونته و اهو وفريج سعود اكثر و ها هذول من الكويت
مو العالم الوهمي
الله يعينك

غير معرف يقول...

;/

أكرههم الدعايات اللاحقيقية

شرايك باللاحقيقية بس؟

BenTBonD يقول...

هههههه انا لاحظت هالشي اول ماييت الدوام
ولااا بعد دازيين ايميل حقي
قلت استريييحووووا زييييييين سيده مسحته

ناام يبا ناام وخل هذي عنك ههههه

7osen يقول...

هههههههههههههه

عجبني البوست

يعطيك العافية

وانت صاج تقولك مريت وعجبتني المدونة
وعند الكل تقول نفس الحجي ههههههه

ضحكتني والله

بس عاد صج مدونتك متميزة
لأنك انت انسان روحك حلوة وخفيف الظل

:)

mo3ath يقول...

انا قعدت من النوم ولا اشوفهم دازين لي ايميل اني اصير من الناس الي يكتبون ، خو توني قاعد وقبل لااغسل ويهي اجيك على الكمبيوتر لوووول

على ماسبحت وبدلت ولا ماكو وقت اجيك على شي قلت بعدين ، توك ذكرتني :q

اعجبتني المدونه خلها عامه والله يزيد ويبارك بالردود ان شالله :q

Funny Q8i يقول...

صبا

الله يجعلچ الاولى دايما بكل شي :)

بس وين الي "سأعود"؟

چنچ خلعتي ههههه

Funny Q8i يقول...

enter-q8

يمعود 1300 هندي،

الدخلة على امية فلس اخاف صج

خليها على الله

وشاكر لك الطلة البهية :)

Funny Q8i يقول...

mai

اللاحقيقية واللامنطقية والانسيابية كلها من مواصفات السيارة اللاخيالية الي راح اشتريها اول ما تطلع ههههه

يا جماعه عطوني مخده خل اناااام ههههههه

Funny Q8i يقول...

bent bond

نمت وقعدت وليلحين المسج موجود :)

للتعريف بس بنت بوند حصلت نفس الرسالة مع ان مدونتها مافيها الا بووووووست واحد

وياهلا ببنت بوند :) ناطر بوستج اليديدة p;

Funny Q8i يقول...

7osen

الله يعافيك حبيبي

شوف ضحكتك هذي عندي بالدنيا :)

والمدونة متميزة بزوارها والا انا شخص عادي جدا :)

الغريبه تقول انها حبت تترك بصمة

عاد طلّيت بويهي بالمنظرة ما لقيت شي!!

وياهلا بحسون الملعون هههههه

اموون ولا ما امووون D:

Funny Q8i يقول...

mo3ath

المدونة عامة وستضلّو (شوف قاعد احاچيك بالنحوي) عامة

المشكله انها دازه حق كل المدونات! معقوله كل المونات هذي عاجبتها؟!!

بالذمة في ذوق شوية بالاختيار, يعني حتى لو تسوي دعاية يمكن اطوف بس شكلها قاعدة تدز يمين ويسار بشكل عشوائي، يعني ما في حتى انتقاء!

خليها على الله

سفيهوه شلونه D:

BenTBonD يقول...

ههههههههههههههه اتطنز ان مافيه الا بوست واحد؟!
انا يا يبا مسوية رجيم عشان جذي ماكو الا بوست واحد مو نفسك هههه

إرسال تعليق

تعليقك يهمني، بس تكفه لا تكسر مياديفي :)