بما انه اليوم اول يوم رجيم لي فقلت حق روحي لازم اسوويلي دسيتير صغير حق خطتي في النزول بوزني الى سابق عهده، و قسمته إلى عدة مواد:
مادة أولى
يمنع منعا باتا جميع انواع المشروبات الغازية، دايت او غيره
مادة ثانية
تمنع جيمع انواع النشويات او مشتقاتها المصنوعة من الطحين الأبيض
مادة ثالثة
شربت ماشربت ولا عصير ماكو، ولا لبن بعد!
مادة رابعة
خو چاي وقهوة ما اشرب، بس شكلي بشرب من السوالف الحارة مثل قرين تي مادري شنو!
مادة خامسة
كيك، بريد، ككاو، شنو هذيلة ماعرفهم، اصلا اول مرة اسمع فيهم!
مادة سادسة
عزيمة؟!! ،،، انشااااالله، طووط طووط طووط!
مادة سابعة
محد يشوفني وانا اكل!
مادة ثامنة
يوميا لازم اطالع اعلانات الاجهزة الرياضية!
مادة تاسعة
٣ مرات اسبوعيا مشي في الممشى
مادة عاشرة
٣ مرات سباحة او ايروبكس او اطالع "تو الليل"!
مادة احدعش (بالكويتي)
العب حديد مرة بالاسبوع على الاقل او اسوي معاملة بالوطني
مادة اثنعش
عدم الشبع قدر الامكان
مادة ثلثتعش
شرب درامين ماي يوميا
مادة اربعتعش
نام نام نام
مادة خمستعش
الالتزام بوجبة من السلطة يوميا
مادة ستتعش
الفوود كورت ما أوطوط صوبه
مادة سبعتعش
لو انجبرت على الحلو مالي غير ٣ ، فراولة، كيوي، اناناس
مادة ثمنتعش
ممكن استخدام سكر الرجيم
مادة تسعتعش
بيض ولحم وسمج ودياي وجبن وسلطات، هذا اكلي
مادة عشرين
يؤخذ الوزن وقياس الخصر مرة اسبوعيا، وقياس الشسمة مرتين
مادة واحدوعشرين
لو اشوف اي اعلان حق شندويجة او بيتزا اوما شابه بلف ويهي واستغفر!
مادة اثنينوعشرين
اول اثنين بالشهر يكون يوم مفتوح
مادة ثلاثوعشرين
في حال كسر اي من المواد السابقة يلغى بريك الاثنين اوتوماتيكيا
***
او اني الاقيلي وحدة احبها وبچذيه راح اضعف بدون كل اللي طاف!
هناك 25 تعليقًا:
ههههههههههههههههههههههههههههههههههههههههههههههههههههههههههههه
موتني من الضحك
المادة الأخيرة مو ناقص الا تضيف عليها وطراق على عيني
لووووووووووول
حرام عليك شنو هذا
ماكو عصير
أنا غرامي العصير
بيتنا يسموني شجرة (مو حلو تكتب الاسم بالكويتي خله لغة عربية أحسن)
وبعدين يعني شنو محد يشوفك وانت تاكل
عذااااااااااااب تنخش يعني
وصدقني لي حبيت وحده بتمتن!!
انا اشوف الرياييل الحبّيبة يمتنون!!
على فكرة:
ممكن دورة على التصوير الفوطوغرافي
شبيك لبيك الحبيبة بين يديك. بس خلاص، هدك عن هل دستور، تعال تقيد إبدستوري أنا ^^
مادة سادسة
عزيمة!! ،،، انشااااالله، طووط طووط طووط!
فصلت عليها اذا قالوا لك افا مااا اتييي الديوانية
لوووووول و على طاري اخر شي بالاحمر اذا تزوجت بتمتن زيادة و قوول عبود ما قال
يعني انت فكر فيها فرنسية 55 سعرة حرارية :P اشويه
سجلني مواطن عندك ومتقيد بدستورك D:
لوووووول عطني اسبوع واصير خارج على القانون
سالفه يوم الاثنين خلها اسبوعيه ليش بس اول الشهر :q
العصاير مالها ذنب بس إذا قصدك صمدي وربعه انا معاك :) يمدحون عصير الاناناس
ZooZ
:)
لا وفنقر بعد p:
في عصير مال رجيم بمركز سلطان ما استغني عنه
علشان محد يقولي "ماكلت شي!!!!" حتى لو اكون زاحر الاكو والماكو!!
عقب ما يتزوجوووون! يمتنون من القهر لووووووول!
وبالنسبة حق التصوير الفوططوغرافي حاضرين ;)
بس يبيلچ كاميرا ونص درزن عدسات
اول شي تحطين الكاميرا في حمام مائي ليما تسيح
بعدين تكسرين عليها عدستين وتحطينها بالفرن
وباجي العدسات للتزيين وبالهنا والشفا
عساك عالقوة
nq
بسم الله الرحمن الرحيم
من وين طلعتي انتي؟
انا قايل الماوس هذي فيها شي p:
الله يستر من دستوورچ! حيييييييي!
==============
3bady
ماروح دواوين! اصلا هذي يبيلها مادة بروحها ههههه
قبل الزواج تضعف وبعده تكرش
ما اتعاطى كافيين! لا فرنسية ولا نمساوية
=============
mo3ath
هذا من اولها انقلاب!
سو حسابك سجن عسكري، ودق! ماكو يمه ارحميني
علشان يوم واحد يخرب الاسبوع بكبره
عصير الكيوي وحدة بوحدة، احسن شي بعد اي وجبه تخريبية، چنك مسوي ديليت (:
اقسم بالله العظيم ان ادافع عن البلد وقوانين الدوله
شلون بتسوي رجيم وانته قبل جم يوم رايح هاقنداز لازم تحط عليه اكس احمر
محسد
الله يقويك :)
============
kuwait master
مو قلنا ختامها هاقنداز D:
بس توووووووووبة
حي حي حي حيييييي!
LOOOOOOOL
حلوة استغفر بعد الاعلان او الصورة D:
يالله ، اذا اتبعت الدستور لك مني الي تبيه :)
كاااااااااااااااااك
الغي الدستور وحب لك وحدة احسن لك :p
لا لا لا مابي اكل
لازم جم بوست دورات فوطوغرافية
عندي كاميرا
Canon EOS
REBEL XTi
Made in Japan
العدسة
Canon
Image Stabilizer
EFS 55-250mm
IS 1:4 - 5.6
وبرضو
Made in Japan
ماكو شي مكتوب على الكاميرا ما كتبته
mai
شكرا على التشجيع :)
اي شي؟ p;
=============
mishari
على اييييدك بس وينها سعيدة الحظ المقرودة
لووووووووووول
ZooZ
السيريال مال الكاميرا ماكتبتيه هههههه
بوستات عن التصوير، ما اعتقد اني راح ازيد على كلام السايتات الموجودة، انا عندي فوق العشرتالاف صورة بدون مبالغة ومالي خلق اصنفهم من كثرهم!! كل ما اطل اتعب وابطل!
بعدين انا نايكوني مو كانوني p: بس راح اشوف شنو ممكن يطلع وياي ;)
هههههههههههههههههه
حلوة هذي
"مادة ثامنة
يوميا لازم اطالع اعلانات الاجهزة الرياضية!"
انا اقولك قطلك 200 دينار على اكل دينا ولينا حق شهر كامل وفك عمرك عشان ماتفكر شنو تاكل
بس انت حاول انت تتحرك كثر ماتقدر
لان احنا الكويتيين رباديين
واولهم انا
كل مادشت علي امي شافتني منسدحة عالفراش ومجابلة اللابتوب وتقولي شلون بتضعفين وانتي كله متبطحة؟؟
انا اقول ان الكويتيين مومال رجيم كلش واذا سوو رجيم يقعدون اسبوع اسبوعين بعدين يردون ياكلون هههههه
الاكل نعمه ومحد يقدر يقاومه
واتمنالك الحظ السعيد وان شاء الله يبين عليك الضعف دام انك تبيه
sham7o6a
لانه علشان الواحد يضعف لازم يصدق انه ممكن يضعف والاعلانات تخليچ تصدقين من كثر ما يحطون صور قبل وعقب، فالمخ يصدق وما ييأس بسرعة. :)
ماكو شغل اقط 200 دينار لووووول لا تحاتين انا خبير باكل الرجيم اللي بميتي اسويه ب 50 ;) تبين؟ p;
اكل الرجيم مالي حلو، بس محتاج رياضة مثل ما قلتي :)
وانتي عاد هم تحركي مو كله طايحة عاللابتوب مثلي p;
تعالي سابقيني بممشى مشرف p;
الله يهدالك الواحد يصدق بس من بعد مايشتري الجهاز يقطه ومايستعمله
انا شريتلي جهاز ابروكيت مال المعده استعملته اول الايام والحين يسمع حسك مادري عنه لووول وبالاصح مافاد وياي
دام اتعرف تسوي رجيم عطني شي ينفعني
انا مفكرة اجرب بو 200 دينار
لان الصراحة انا ماحب الفاكهة كلش وماعندي وقت اسويلي اكل
يعني ارد من الدوام هلكانة من الشغل ويكون مالي خلق اسويلي شي فعشان جذي ابي شي جاهز
وترى انا حق المشي عند ويهك احب المشيي بس اهني بالكويت مايساعد كلش
walla nice!! Good Luck and plz nabee eltzaaaam o estmraaar mo bas yomayn o tba6el ;p
لووول ان اقول الله يعينك
مع ان يتراوالي انك من اول اسبوع راح تكسر هالمواد والدستور بكبره بس ما عليه
خل نشوف النتيجه بالنهايه
sham7o6a
بوميتين الحين وبعدين شلون؟!!
الا اذا كنتي بس بتعودين نفسج على اكل الرجيم ممكن، بس اذا خذيتي حاولي تتعلمين شلون تسوين نفس الاكل بنفسج علشان تقدرين تكملين ولا بترجعين كل اللي خسرتيه وراحت عليج الميتين يا حلوة :)
والمشي زين حتى لو بدون رجيم ، مثلچ حلوة بدون ميك اب p;
===========
palomino
ان شاء الله بلتزم علشانچ p; علشان ما تعيبيين علي بعدين اذا خربته هههههه
===========
ducati
هذا دسطووور يبي رجاااال ، وانا عند ويهك
بس عطني اسبوع واسوي انقلاب
من كلامك مادري ليش احس انك تعرفني هههههه
انا بجرب بو الميتين بشوفه اذا فاد معاي بكمل عليه او اني اسوي نفسه واذا مافاد بخليه يولي واعتزل الرجيم بكبره
لان انا ابي شي يفيد وياي ويبين علي
هو في ايه
i lost my 2 n sumthing KG's in just 4 days .. ask me how ... well the only thing u have to do is to skip the first meal ( breakfast ) and the third meal ( dinner ) .. u only have to eat lunch at 4 PM .. well that is my stupid philosophy behind loosing the 2 kg's i know it wont work for u or for anyone cz hehe kwty ppl cant stay a min without chewing sumthing :P ...
hope it will work for u ..otherwise u have fall in love with a girl and then ur gonna need anger managment courses :P
sham7o6a
وهل يخفى القمر :)
شوفي انتي اخذي بوميتين والأكل بالنصيفة p;
وهذا ويهي اذا ما ضعفتي D:
===============
عتوي الفريج
أعرفكم بعتوي الفريج، رفيجي الدايخ D:
ماعليه يبيله شوي على ما يتعلم فن التعليق :)
===============
Monaya
how ;p
Losing 2 kg isn't gona do me anything :p
I can loose 2 kg in 2 days ;) Really.
I aim for the Gold
And you know what, it's not about weight anymore, cus working out makes me gain muscle weight in the same time I'm losing fat.
just give me 2 months & see ;)
And thanks for checking ;p
هههههههه عاد توه امي تكلمني عن الرجيم تقولي دشي نادي
قتلها انا بروحه ارد من الدوام حدي هلكانة وين اقدر اروح النادي؟!!
ولا والله اي قمر؟ صج والله منو؟
إرسال تعليق
تعليقك يهمني، بس تكفه لا تكسر مياديفي :)